Almaty qalasynyń ákimi Darhan Satybaldy Áýezov aýdany aýmaǵynda ornalasqan birqatar áleýmettik mańyzy bar nysandardy aralap, júrgizilip jatqan jumystarmen tanysty, dep habarlaıdy Egemen.kz
Qala ákimi aldymen Saıran shaǵyn aýdanynda boldy. Bul aýdanda kórkeıtý jumystary 10 mamyrda bastalǵan. Joba sheńberinde 14 aýla jańǵyrtylyp, kólge aparatyn jol salynady. Sondaı-aq, jaıaý júrginshiler joly men sport alańdary jańartylyp, kóshe shamdary, beınebaqylaý qurylǵylary ornatylady. Darhan Satybaldy mundaǵy turǵyndarmen kezdesip, olardyń usynystaryna qulaq asty.
Qala basshysy aıaq tiregen kelesi mańyzdy nysan «Tıgrohaýd» saýda orny. Onda qaıta jańartý jumysy júrgizilip jatyr. Jaqynda aýmaq kólemi 7000 sharshy metrge deıin ulǵaıtylady. Sonyń nátıjesinde shamamen 300 jańa jumys orny ashylady dep josparlanǵan.
Áýezov aýdanyndaǵy mańyzdy mádenı oryndardyń biri - N.Sas atyndaǵy balalar men jasóspirimder teatry. Teatrda jóndeý jumystary bekitilgen kestege sáıkes júrgizilip jatyr. Jańartý barysynda jańa sahna, zamanaýı tehnıkalyq quraldar ornatylyp, teatr aýmaǵy kórkeıtiledi.
Sondaı-aq, Áýezov aýdanyndaǵy qalalyq emhanada da kúrdeli jóndeý jumystary jalǵasyp jatyr. Qazir 58 myńǵa jýyq turǵynǵa qyzmet kórsetetin medısınalyq mekeme joǵary júktememen jumys isteıdi. Jóndeýden soń emhana qyzmetin paıdalaný turǵyndar úshin áldeqaıda ońtaıly bolmaq.
Darhan Satybaldy jaýapty mamandarǵa barlyq joba ýaqytyly oryndalýyn, jumystardyń sapaly júrgizilýin, sondaı-aq nysandardyń barlyq sanattaǵy azamattar úshin qaýipsiz ári qoljetimdi bolýyn qamtamasyz etýdi tapsyrdy.
Damıra TО́LEGEN
EUÝ stýdenti