Astana Mining & Metallurgy-diń 15-shi halyqaralyq taý-ken metallýrgııa kongresi aıasynda QR О́nerkásip jáne qurylys mınıstrliginiń Geologııa komıteti ERG kompanııasy sıfrlandyrǵan tarıhı geologııalyq esepterdiń elektrondyq katalogyn turaqty paıdalanýǵa qabyldady, dep habarlaıdy Egemen.kz.
Elektrondyq katalog quramyna 1934 jyldan bergi Qostanaı jáne Aqtóbe oblystaryndaǵy 898 geologııalyq esep engizilgen. Bul qujattar sıfrlandyrylyp, geografııalyq baılanys pen yńǵaıly izdeý júıesi arqyly tolyqtyryldy, bul óz kezeginde olardyń taldaýyn jáne praktıkalyq qoldanylýyn edáýir jeńildetedi. Katalogta vektorlyq geologııalyq kartalar da bar, olardy zamanaýı geoaqparattyq júıelerde tıimdi paıdalanýǵa bolady.
«Atalǵan arhıvti tapsyrý — ERG kompanııasynyń eldegi salany sıfrlandyrýǵa qosqan úlesi. Endi geologııalyq málimetter memleketke, ǵylymǵa jáne barlyq múddeli taraptarǵa qoljetimdi. Bul jobany tabysty áriptestiktiń úlgisi dep baǵalaımyz jáne bolashaqta da yntymaqtastyqqa ashyqpyz», dedi QR О́QM Geologııa komıtetiniń tóraǵasy Erlan Aqbarov.
Katalog geologııalyq barlaý sapasyn arttyrýǵa, jer qoınaýyn paıdalanýda negizdelgen sheshimder qabyldaýǵa, bilim berý men ǵylymı jobalardy qoldaýǵa jáne Qazaqstannyń ınvestısııalyq tartymdylyǵyn arttyrýǵa baǵyttalǵan.