Almaty oblysynyń ákimi Marat Sultanǵazıev jumys saparymen Talǵar aýdanyna bardy. Sapar barysynda óńir basshysy bolashaq «Atletıko de Madrıd» fýtbol akademııasynyń qurylys alańynda bolyp, jobanyń júzege asý barysymen tanysty, dep habarlaıdy Egemen.kz.
Joba Talǵar aýdanyndaǵy jumys istep turǵan «Aqbulaq» sport ortalyǵynyń bazasynda júzege asyrylýda. 2024 jyldyń qyrkúıek aıynda «Sport Asset Management» qoǵamdyq birlestigi men «Doscar Group» JShS ıspanııalyq «Atletıko de Madrıd» fýtbol klýbymen birlesken qyzmet týraly kelisimge qol qoıdy. Osy kelisim aıasynda Ortalyq Azııada alǵashqy «Atletıko de Madrıd Qazaqstan» fýtbol akademııasyn qurý josparlanǵan.
Akademııa qurylysy úsh kezeńmen júrgiziledi. Birinshi kezeń – balalar akademııasynyń nysandaryn salý – 2025 jyldyń mamyrynda bastalyp, 2026 jyldyń sońyna deıin aıaqtalady dep kútilýde. Qazirgi tańda qonaqúı ǵımaraty qaıta jańartylyp, bir fýtbol alańynyń rekonstrýksııasy qarqyndy júrgizilýde. Bul nysannyń paıdalanýǵa berilý merzimi – 30 maýsym.
Qazirgi ýaqytta kelesi nysandar boıynsha jobalyq qujattamalardy kelisý jumystary júrgizilýde. Tarqatar bolsaq, 20 kıim aýystyratyn bólmesi, dýsh kabınalary, medısınalyq pýnktteri, jattyǵý jáne konferens-zaldary, kórermenderge arnalǵan alańdary bar ákimshilik-turmystyq keshen. Sondaı-aq, qys mezgilinde jattyǵýǵa arnalǵan jasandy jabyny bar jabyq karkasty fýtbol zaly jáne jasandy tósemi bar eki ashyq fýtbol alańy, qaqpashylarǵa arnalǵan jattyǵý alańy boıynsha kelisý jumystary jasalýda. Burynǵy sadaq atý ǵımaratyn zamanaýı ótkizý pýnktine aınaldyrý, ıaǵnı kirý aımaǵy, sanıtarlyq toraptar, kútý zaly jáne kafeterıı qarastyrylǵan.
Jobanyń ekinshi kezeńinde kásibı fýtbol komandalaryna arnalǵan ınfraqurylym qurylmaq.
Al úshinshi kezeńde 10 000 kórermenge arnalǵan úlken stadıon salý kózdelip otyr.
Akademııa tek sporttyq baza ǵana emes, bolashaqta álemdik deńgeıdegi fýtbolshylardy daıyndaıtyn ortalyqqa aınalyp, qazaqstandyq fýtboldyń damýyna jańa serpin beredi dep kútilýde.
Atalǵan jobaǵa Almaty oblysynyń ákimdigi jan-jaqty qoldaý kórsetedi. Infraqurylymmen qamtamasyz etý, qajetti ruqsat qujattaryn jedeldetý jáne qurylys barysyn úılestirý – óńir basshylyǵynyń turaqty baqylaýynda.
Almaty oblysy