Májilis depýtaty Asylbek Nuralın elorda men iri qalalardaǵy kólik keptelisin azaıtý maqsatynda memlekettik organdar men ulttyq kompanııalarda jumys kúniniń bastalý ýaqytyn tańǵy 7:00–8:00-ge jyljytýdy usyndy, dep habarlaıdy Egemen.kz.
Depýtattyń aıtýynsha, Astana men basqa da iri qalalarda kólik qozǵalysynyń kúrdelenýi kún sanap artyp keledi. Joldardyń shamadan tys júktelýi men qoǵamdyq kóliktiń turaqsyz júrýi qala turǵyndary men ınfraqurylymǵa aıtarlyqtaı salmaq túsiredi.
«Boljamdarǵa sáıkes, aldaǵy jyldary elorda halqynyń sany 2 mıllıon adamǵa jetýi múmkin. Qazirgi tańda jumys oryndarynyń basym bóligi men áleýmettik ınfraqurylym nysandary qalanyń ortalyq bóliginde shoǵyrlanǵan. Jaqyn mańdaǵy eldi mekenderden qalaǵa bir ýaqytta aǵylǵan adamdar kólik kollapsyna sebep bolady», dedi depýtat.
Onyń aıtýynsha, statıstıkalyq málimetterge sáıkes, Astanada jumys isteıtinderdiń 50 paıyzdan astamy memlekettik mekemelerde eńbek etedi.
«Osyǵan baılanysty, ortalyq atqarýshy organdar, ulttyq kompanııalar men olardyń vedomstvolyq uıymdarynyń qyzmetkerleri úshin kólik aǵynyn qaıta bólý múmkindigin qarastyrý qajet. Sondaı-aq aglomerasııalyq kólik saıasaty aıasynda atalǵan sanattaǵy mekemeler úshin jumys ýaqytyn ózgertý múmkindigin qarastyrý kerek. Zertteýler tańǵy ýaqyt eńbek ónimdiligi turǵysynan tıimdirek ekenin kórsetip otyr. Jumys ýaqytyn saǵat 9:00-den 7:00–8:00-ge jyljytý usynylyp otyrǵan sharalarǵa saı keledi», dedi Asylbek Nuralın.
Osyǵan baılanysty ol kólik salasyndaǵy profılaktıkalyq is-sharalardy ázirleý, bıýdjetterde iri qalalardyń ınfraqurylymyn jańǵyrtýǵa qosymsha qarajat qarastyrý jáne jol aıryǵyn, ótkelderdi josparlaý men salý jáne jol qozǵalysyn uıymdastyrýda ortalyq pen óńirler arasyndaǵy úılestirýdi kúsheıtý úshin vedomstvoaralyq jumys tobyn qurýdy usyndy.
Aıta keteıik, buǵan deıin Astana ákimdigi jumys kúnin tańǵy 7:30-dan bastaýdy qarastyrǵan bolatyn. Ákimdik málimetinshe, jumys kestesin ózgertý shamamen 30 myń adamdy qamtyp, tańǵy kólik keptelisin azaıtýǵa kómektesedi.