OpenAI kompanııasy ChatGPT júıesine oqytý rejimin iske qosty. Bul múmkindik stýdentterge daıyn jaýap berýdiń ornyna, oılanýǵa, suraqtyń mánin túsinýge, durys sheshim tabýǵa kómektesýdi maqsat etedi. Endi JI birden jaýapty aıtpaıdy kerisinshe, paıdalanýshyny birneshe kezeńmen oılaý, naqtylaý suraqtaryn qoıý jáne sheshimdi óz sózimen túsindirýge baǵyttaıdy, dep jazady Egemen.kz.
Mysaly, stýdent emtıhanǵa daıyndalyp otyr delik. Buryn ol ChatGPT-ke suraq qoısa, tikeleı jaýap alyp otyrǵan. Endi jańa rejimde JI: «Bul suraqta ne aıtylyp tur dep oılaısyń?» «Qandaı nusqalar bar, sen nege bireýin tańdadyń?», «Seniń sheshimińniń sebebi qandaı?» degen sııaqty suraqtar qoıyp, oılaý qabiletin damytýǵa kómektesedi.
OpenAI bul múmkindikti muǵalimdermen, ǵalymdarmen, stýdenttermen birlesip jasaǵan. Joba «ChatGPT zerthanasy» degen bastama aıasynda júzege asqan. Onda stýdentter JI-di qalaı qoldanatynyn aıtyp, pikir bólisip otyrǵan.
OpenAI-dyń bilim jónindegi vıse-prezıdenti Lııa Belskı: «Eger ChatGPT-ti repetıtor sııaqty qoldansa, ol stýdenttiń bilimin shynymen jaqsartady. Al daıyn jaýap úshin paıdalansa – oqýǵa kedergi keltiredi», deıdi.
Kompanııa bul rejimdi stýdentterdiń kóshirýge emes, úırenýge baǵyttalýy úshin jasap otyr. Sebebi qazirdiń ózinde árbir úshinshi stýdent ChatGPT qoldanady.
Jańa fýnksııa tegin qoldanýshylarǵa da, Plus/Pro/Team nusqalaryn paıdalanýshylarǵa da qoljetimdi. Jaqyn kúnderi ChatGPT Edu júıesine de engiziledi.
Bul jańalyq OpenAI basshysy Sem Altmannyń bolashaqta ýnıversıtetter mańyzyn joǵaltýy múmkin degen málimdemesinen keıin jarııalanyp otyr. Ol JI damyǵan saıyn oqý júıesi de múlde basqa bolatynyn aıtady.