City Transportation Systems (CTS) kompanııasy LRT negizgi jelisinde relsterdi tóseý jumystary aıaqtalǵanyn habarlady, dep jazady Egemen.kz.
Jalpy uzyndyǵy 22,4 shaqyrym bolatyn qurylystaǵy №101–118 stansııa aralyǵynda jáne olardyń aralyqtarynda 89 600 pogondyq metr rels tóselgen. Qazir relsterdi dánekerleý júrgizilip jatyr, odan keıin olardyń sońǵy bekitýi bastalady.
«Qurylys barysynda quramynda temir mólsheri joǵary kómirtekti bolattan jasalǵan relster qoldanyldy. Olar jiksiz tóseý tehnologııasy tásilimen aldyn ala kernelgen shpaldarǵa zamanaýı DTVII2-1 bekitý júıesi arqyly ornatyldy. Aıtylǵan tehnologııa jyljymaly quramnyń qozǵalysy kezinde shý men diril deńgeıin edáýir tómendetýge múmkindik beredi. Bul óz kezeginde jolaýshylar men jaqyn mańdaǵy aýdan turǵyndaryna qolaısyz jaǵdaı týǵyzbaý úshin jasalǵan», delingen City Transportation Systems kompanııasynyń habarlamasynda.
Endi tótenshe jaǵdaılar kezinde jolaýshylardyń qaýipsizdigin qamtamasyz etetin evakýasııalyq platformalardy ornatý jumystaryn júrgizý josparlanǵan.