Ulttyq bank tóraǵasy Tımýr Súleımenov Qazaqstannyń bank júıesinde shamamen 8 trln teńge artyq ótimdi aqsha jınalyp qalǵanyn, artyq aqshanyń 3,5 trln teńgege deıingi bóligin, ıaǵnı 40%-dan astamyn, eń tómengi rezervtik talaptardy (ERT) qatańdatý tetigi arqyly alýdy josparlap otyrǵanyn aıtty, dep habarlaıdy Egemen.kz.
«Qalǵan ótimdilik nesıe berýge jáne jobalardy júzege asyrýǵa tolyq jetkilikti. Sondyqtan bul qadam qaryz berýge áser etpeıdi. Sonymen birge biz aıtarlyqtaı antıınflıasııalyq áser kútemiz, óıtkeni ekonomıkanyń shamamen 3 trln teńgesin alyp tastaı alamyz», dedi Súleımenov.
UB tóraǵasynyń aıtýynsha, monetarlyq, monetarlyq emes jáne aralas túrleri bar. Al ERT – monetarlyq ınflıasııamen kúres quraldarynyń biri. Bul jolǵy sheshim saraptamalyq taldaý, pikirtalastar jáne banktermen keńesýler nátıjesinde jan-jaqty qarastyrylyp qabyldanǵan.
«Árıne, bankter bul sheshimdi qol soǵyp qarsy alǵan joq, biraq jalpy konstrýktıvti túrde qabyldady. Olar joǵary ınflıasııa ekonomıkanyń, ózderiniń jáne halyqtyń basty táýekeli ekenin túsinedi. Biz ınflıasııany qalypty deńgeıge neǵurlym tez qaıtarsaq, bul bankter úshin de soǵurlym paıdaly bolady», dep atap ótti Ulttyq bank tóraǵasy.
Ulttyq banktiń shildedegi derekterine sáıkes, eldegi aqsha massasy (ekonomıkada aınalysta júrgen barlyq aqsha) 47,2 trln teńgeni qurady. Osylaısha, artyq aqsha jalpy aqsha massasynyń 12,7%-na teń bolyp otyr.