QR Premer-mınıstriniń birinshi orynbasary Roman Sklıardyń jetekshiligimen Investısııalyq shtabtyń kezekti otyrysy ótti. Basqosýda agroónerkásip kesheni, farmasevtıka jáne azyq-túlik ónerkásibi syndy negizgi baǵyttardaǵy ınvestısııalyq jobalardy júzege asyrýdyń ózekti máseleleri qaraldy. Sonymen qatar, ınvestısııalar týraly kelisimderdiń basty sharttary maquldandy, dep habarlaıdy Egemen.kz.
Úkimettiń baspasóz qyzmetiniń habarlaýynsha, bekitilgen bastamalar qatarynda Khan Tengri BioPharma, Asyl Sugar, Carlsberg Central Asia, Fabe-Agro kompanııalarynyń jobalary, sondaı-aq Túrkistandaǵy maqta ósirý agroónerkásip kesheni bar.
Khan Tengri BioPharma kompanııasy jalpy quny 103 mlrd teńgeden asatyn bıofarmasevtıkalyq zaýyt salady. Joba eldegi mańyzdy dárilik preparattardy shyǵarý qýatyn arttyryp, 180-nen astam jańa jumys ornyn qurýǵa múmkindik beredi.
Agroónerkásip salasynda kelesideı jobalar maquldandy:
Asyl Sugar kompanııasy jylyna 200 myń tonnaǵa deıin qant óndirý qýaty bar zamanaýı qant zaýytyn salýdy josparlap otyr. Joba qant qyzylshasyn tereń óńdeýge, ımportty almastyrýǵa jáne elimizdiń strategııalyq azyq-túlik ónimderi boıynsha ózin-ózi qamtamasyz etý deńgeıin arttyrýǵa baǵyttalǵan. Jalpy ınvestısııa kólemi – 72 mlrd teńge.
Carlsberg Central Asia óndiristik qýatyn jylyna 340 mln lıtrge deıin ulǵaıta otyryp, sýsyndar óndirisin keńeıtý jobasyn júzege asyrady. Joba aıasynda energııa únemdeıtin tehnologııalar men jańa óndiristik jeliler engiziledi, bul básekege qabiletti ónim shyǵarý kólemin arttyrýǵa múmkindik beredi. Investısııa kólemi – 216 mlrd teńge.
Fabe-Agro kompanııasy jylyna 38 myń tonna kókónis óńdeý qýaty bar agroónerkásip keshenin qurady. Keshenniń quramyna jem-shóp, ósimdik maılary jáne basqa da ónimder óndirisi kiredi. Bul shıkizatty jergilikti jerde óńdeýdi damytýǵa jáne ımportqa táýeldilikti azaıtýǵa yqpal etedi. Investısııa kólemi – 68 mlrd teńge.
Túrkistandaǵy maqta ósirý agroónerkásip kesheni jylyna 121 myń tonna óndiristik qýaty bar maqtany tereń óńdeý jobasyn júzege asyrady. Bul toqyma ónimderine deıingi tolyq sıkldi jolǵa qoıýǵa, jańa jumys oryndaryn ashýǵa jáne jeńil ónerkásiptiń damýyna múmkindik beredi. Jalpy ınvestısııa kólemi – 58 mlrd teńge.
Atalǵan jobalardyń barlyǵy azyq-túlik qaýipsizdigin arttyrýǵa, aýyl sharýashylyǵy ónimderin tereń óńdeýdi damytýǵa, ımportty almastyrýǵa jáne qosylǵan quny joǵary ónim shyǵarýǵa baǵyttalǵan.
Sonymen qatar kún tártibinde PepsiCo kompanııasynyń tuzdy jeńil taǵamdar shyǵarý jobasyn ınfraqurylymmen qamtý máselesi de talqylandy. Jospar boıynsha kásiporyn jylyna 70 myń tonna daıyn ónim óndiredi, al ınvestısııa kólemi shamamen 200 mlrd teńgeni quraıdy.