Álemge tanymal qazaqstandyq ánshi Dımash Qudaıbergenniń Qytaıdyń Hunan Broadcasting System telekompanııasymen birlesip júzege asyryp jatqan Voice Beyond Horizon halyqaralyq mýzykalyq jobasynyń túsirilimderi elimizdiń eń kórikti óńirlerinde jalǵasyp jatyr, dep habarlaıdy Egemen.kz.
Týrızm jáne sport mınıstrliginiń habarlaýynsha, mýzykalyq shoý Qazaqstandy mıllıondaǵan kórermenge joǵary týrıstik áleýeti bar memleket retinde tanystyrýdy kózdeıdi. Túsirilimder Túrkistan, Mańǵystaý, Almaty jáne Aqmola oblystarynda, sondaı-aq Almaty men Astana qalalarynda ótedi. Shoýdyń fınaly elordada uıymdastyrylady dep josparlanǵan.
«Dımash Qudaıbergen men jobaǵa qatysýshylar Túrkistan oblysynan Aqtaý qalasyna at basyn burdy. Túsirilim aıasynda Kaspıı teńiziniń jaǵalaýynda jáne Qazaqstannyń eń áserli tabıǵı muralarynyń biri – Bozjyra shatqalynda óner kórsetý josparlanǵan. Túsirilimge Qytaı, Qazaqstan, Qyrǵyzstan, Italııa, Malaızııa jáne Serbııadan kelgen talantty oryndaýshylar qatysyp jatyr. Qatysýshylardyń kásibı deńgeıin arnaıy shaqyrylǵan halyqaralyq sarapshylar baǵalaıdy», delingen habarlamada.
Jobany júzege asyrýǵa QR Týrızm jáne sport mınıstrligi, Mádenıet jáne aqparat mınıstrligi, «Kazakh Tourism» ulttyq kompanııasy jáne óńirlik ákimdikter qoldaý kórsetip otyr.
Aıta keteıik, bıyl Týrızm jáne sport mınıstrligi 2025–2029 jyldarǵa arnalǵan «Mańǵystaý» týrıstik aımaǵyn damytý jónindegi keshendi jospardy ázirlegen. Úkimet qaýlysymen qabyldanǵan bul qujat óńirdi 9 baǵyt boıynsha damytýdy kózdeıdi. Jospar týrısterdi tartýǵa jaǵdaı jasap, ınvestısııalyq ahýaldy jaqsartýǵa yqpal etedi.