Prezıdent Qasym-Jomart Toqaevtyń AQSh-tyń Nıý-Iork qalasyna jumys sapary aıasynda transulttyq kompanııalardyń ókilderimen ekijaqty kezdesýler uıymdastyrylyp, Qazaqstannyń ınvestısııalyq múmkindikteri keńinen tanystyryldy.
Ýran óndirý salasyndaǵy yntymaqtastyq
Prezıdent Qasym-Jomart Toqaevtyń AQSh-tyń Nıý-Iork qalasyndaǵy jumys sapary «Cameco» korporasııasynyń prezıdenti Tım Gıtselmen kezdesýden bastaldy. Kanadalyq transulttyq kompanııanyń basshysymen júzdesýde ýran óndirý salasyndaǵy yntymaqtastyq keleshegi talqylandy.
Qasym-Jomart Toqaev «Cameco» «Qazatomónerkásip» ulttyq kompanııasynyń burynnan kele jatqan senimdi seriktesi ekenin atap ótti. Elimizde qyzmet ete bastaǵannan beri atalǵan kompanııa 500 mln dollardan asa ınvestısııa quıǵan ári tehnologııalar transfertine yqpal etken.
Memleket basshysynyń aıtýynsha, Qazaqstan energetıkany damytýdyń jańa kezeńine ótip, aldaǵy ýaqytta úsh atom elektr stansasyn salýdy kózdep otyr. Elimiz atom salasynda qoldanylatyn ınnovasııalyq tásilderge qyzyǵýshylyq tanytady.
Tım Gıtsel Prezıdentke «Inkaı» birlesken kásipornynyń qazirgi qyzmeti men josparlary jóninde aqparat berdi. Bul kompanııa Túrkistan oblysynda ornalasqan ken ornyn shırek ǵasyrdan beri ıgerip keledi.
Qarjy ekojúıesin sıfrlandyrýmańyzdy
Memleket basshysy Qasym-Jomart Toqaev «Goldman Sachs Global Institute» kompanııasynyń jahandyq máseleler boıynsha prezıdenti Djared Koenmen kezdesý ótkizdi.
Qasym-Jomart Toqaev amerıkalyq «Goldman Sachs» jetekshi ınvestısııalyq bankiniń Qazaqstan Ulttyq bankimen uzaqmerzimdi seriktestik ornatqanyn atap ótip, yqpaldastyq deńgeıine joǵary baǵa berdi.
Memleket basshysynyń aıtýynsha, tolyq sıfrlyq memleketke aınalýdy kózdeıtin Qazaqstan jasandy ıntellekt, qarjy ekojúıesin sıfrlandyrý salalaryndaǵy yntymaqtastyqqa qyzyǵýshylyq tanytady.
Al Djared Koen «Goldman Sachs Digital Asset Platform» sıfrlyq qarjy tuǵyrnamasynyń tájirıbesine toqtaldy.
Bilim júıesindegi tájirıbege mán berildi
Prezıdent Qasym-Jomart Toqaev «Educational Testing Service» (ETS) kompanııasynyń prezıdenti jáne bas atqarýshy dırektory Amıt Sevakty qabyldady.
Áńgimelesý barysynda Memleket basshysy «ETS» kompanııasynyń bilimdi testileý men baǵalaý salasynda kósh bastap kele jatqanyna erekshe nazar aýdardy.
Prezıdenttiń aıtýynsha, Qazaqstan kompanııanyń bilim berý júıesindegi tájirıbesin zerdeleý men paıdalanýǵa qyzyǵýshylyq tanytady.
Amıt Sevak Memleket basshysyna kompanııanyń halyqaralyq jumys jospary týraly málimet berdi.
Uıym jylyna álemniń 180 eline 50 mıllıonnan asa test ázirleıdi ári ákimshilendiredi, sondaı-aq ulttyq bilim berý júıesine arnalǵan beıindik sheshimderdi usynady.
Qazaq mádenıetin belsendi dáriptep keledi
Prezıdent Qasym-Jomart Toqaev Smıtson ınstıtýtynyń basshylyǵymen kezdesti.
Qasym-Jomart Toqaev Smıtson ortalyǵynyń halyq shyǵarmashylyǵy jáne mádenı mura arnaıy jobalary jónindegi dırektory Halle Batvınge qazaq mádenıetin AQSh-ta belsendi túrde dáriptep júrgeni úshin alǵys aıtty.
Ortalyq janynan qurylǵan Qazaqstannyń mádenı mura qory ulttyq mádenıetimiz ben ónerimizdi nasıhattaýmen, sondaı-aq qazaq halqynyń tarıhyn, salt-dástúri jáne rýhanı ómirin zertteýge arnalǵan birlesken ǵylymı jobalardy uıymdastyrýmen aınalysady.
Memleket basshysy mádenı dıplomatııa Qazaqstan men Amerıka Qurama Shtattary arasyndaǵy qarym-qatynasty jańa deńgeıge kóteretinine senim bildirdi.
Smıtson ınstıtýty – álemniń eń iri mádenı, bilim berý jáne ǵylymı-zertteý keshenderiniń biri. Onyń quramyna 21 mýzeı men galereıa, 14 ǵylymı jáne bilim berý ortalyǵy, kitaphanalar men ulttyq zoobaqtar kiredi.
Snekter shyǵaratyn zaýyt jaıy talqylandy
Memleket basshysy Qasym-Jomart Toqaev «PepsiCo» qory dırektorlar keńesiniń tóraǵasy Stıven Kıhony qabyldady.
Kezdesýde «PepsiCo» kompanııasynyń Qazaqstandaǵy ınvestısııalyq jobasyn júzege asyrý barysy qarastyryldy. Álemge áıgili brend Almaty oblysynda snekter shyǵaratyn zaýyt qurylysyna kiristi. Investısııa kólemi – 368 mln dollar.
Prezıdent jobany iske asyrýdan kútiletin ekonomıkalyq paıdaǵa nazar aýdardy. Kompanııa 900-ge tarta turaqty jumys ornyn ashýdan bólek, qytyrlaqqa arnalǵan kartopty jergilikti jerde ósirýge nıetti.
Stıven Kıhonyń aıtýynsha, búgingi tańda baǵdarlamaǵa Pavlodar, Aqmola, Qaraǵandy, Almaty jáne Jetisý oblystarynan 15-ke jýyq sharýashylyq qosylǵan. Budan bólek, shıkizatty saqtaý bazasyn keńeıtip, kartop ónimdiligi men sapasyn arttyrý úshin ǵylymı tásilge júginý josparlanyp otyr.
Qasym-Jomart Toqaev «PepsiCo» kompanııasynyń ornyqty agrosharýashylyqty damytý bastamasyna qoldaý bildirip, Úkimet pen jergilikti ákimdik óndiristiń ýaqtyly iske qosylýyna barynsha jaǵdaı jasaıtynyn aıtty.
Spýtnıktik baılanysty jolǵa qoıady
Prezıdent Qasym-Jomart Toqaev «Amazon» kompanııasynyń aǵa vıse-prezıdenti Devıd Zapolskıdi qabyldady.
Qasym-Jomart Toqaev pen «Amazon» kompanııasynyń aǵa vıse-prezıdenti, jahandyq jáne quqyqtyq máseleler jónindegi bas dırektory Devıd Zapolskı sıfrlandyrý, baılanys jáne jasandy ıntellekt salalaryndaǵy yntymaqtastyqtyń jaı-japsaryn talqylady.
Prezıdent «Amazon» kompanııasynyń elimizdiń Jasandy ıntellekt jáne sıfrlyq damý mınıstrligimen, sondaı-aq «Qazaqtelekom» kompanııasymen birlesken jobalardy júzege asyrý josparyna qoldaý bildirdi. Yntymaqtastyq Qazaqstan aýmaǵyndaǵy jyldamdyǵy joǵary ınternetti qamtamasyz etý jáne kıberqaýipsizdikti nyǵaıtý sekildi strategııalyq mańyzdy baǵyttardy qamtıdy.
«Amazon» tek elimizge qatysty jobalardy júzege asyrýmen shektelmeı, Qazaqstandy spýtnıktik baılanystyń óńirlik habyn qalyptastyrýǵa bolatyn alań retinde qarastyryp otyr.
Qazaqstan Prezıdentiniń Nıý-Iorkke jumys sapary aıasynda «Qazaqtelekom» jáne «Amazon Kuiper» kompanııalary «Kuiper» spýtnık jelisiniń qyzmet kórsetýine qatysty dıstrıbıýtorlyq kelisimge qol qoıdy. Soǵan saı «Amazon Kuiper» kompanııasy Almaty, Aqkól jáne Aqtaý qalalarynda óziniń jerdegi ınfraqurylymyn jasaqtaýdy kózdeıdi. Bul jobaǵa 200 mln dollarǵa jýyq ınvestısııa salý josparlanǵan. Atalǵan bastama Memleket basshysynyń sıfrlyq ınfraqurylymdy damytý jáne elimizdiń barlyq óńiri úshin zamanaýı telekommýnıkasııa qyzmetine teńdeı qol jetkizý tapsyrmasyn oryndaý aıasynda iske asyrylady.
Infraqurylym jobalaryn qarjylandyrýǵa nıetti
Memleket basshysy Qasym-Jomart Toqaev «Cerberus Capital Management» kompanııasynyń bas atqarýshy dırektory Frenk Brýnony qabyldady.
Qasym-Jomart Toqaev «Cerberus Capital Management» kompanııasynyń ınvestısııalardy basqarý salasyndaǵy jahandyq kóshbasshylyǵyn joǵary baǵalap, Transkaspıı halyqaralyq kólik baǵytyn damytý aıasyndaǵy ınfraqurylymdyq jobalardy qarjylandyrý nıetin quptady.
Prezıdenttiń aıtýynsha, kompanııanyń strategııasy Qazaqstannyń ulttyq ekonomıkany ártaraptandyrý jónindegi basymdyqtaryna saı keledi. Elimiz kólik-logıstıka ınfraqurylymyn damytýǵa ınvestısııa tarta otyryp, baǵyttardyń ótkizý múmkindigin keńeıtýge qarqyndy túrde kiristi.
Sondaı-aq Memleket basshysy Vashıngtonda Ázerbaıjan men Armenııa arasyndaǵy tarıhı kelisimge qol qoıylýy Orta dálizdiń mańyzdy saýda joldarynyń biri retindegi mańyzynyń arta túsýine oń áser etetinin atap ótti. Keıingi bes jylda Transkaspıı halyqaralyq kólik dálizi arqyly tasymaldanǵan júk kólemi alty ese artty.
Budan bólek, Memleket basshysy kompanııanyń tehnologııalyq platforma men sıfrlyq ekojúıeni taratý salasyndaǵy aýqymdy tájirıbesin atap ótip, Qazaqstandaǵy sıfrlyq bastamalarǵa qatysýdy usyndy.
El ekonomıkasyna zor úles qosqan korporasııa
Qazaqstan Prezıdentiniń Amerıka Qurama Shtattarynyń isker toptary ókilderimen kezdesýi «Chevron» korporasııasy dırektorlar keńesiniń tóraǵasy jáne bas atqarýshy dırektory Maıkl Ýırtti qabyldaýmen jalǵasty.
Memleket basshysy korporasııa elimizdiń ekonomıkalyq damýyna zor úles qosqanyn aıtty. Táýelsizdik jyldary Chevron Teńiz, Qarashyǵanaq sııaqty iri ken oryndaryn ıgerýge atsalysyp, Qazaqstanǵa 55 mlrd dollarǵa jýyq ınvestısııa quıdy. Qazir álemdegi eń iri energetıkalyq kompanııa óndiretin jalpy óniminiń 25 paıyzy Qazaqstanǵa tıesili.
Kezdesýde keleshekte Teńiz kenishiniń aıasyn keńeıtý jobasyn iske asyrý máselelerine, Qarashyǵanaqta gaz óndirý men qaıta óńdeý perspektıvasyna, sondaı-aq álemdik naryqqa kómirsýtegin tasymaldaý isin damytýǵa, sonyń ishinde Orta dáliz arqyly jetkizýge basa mán berildi.
Tehnologııa alybymen tıimdi áriptestik
Memleket basshysy Qasym-Jomart Toqaev «Meta» kompanııasynyń vıse-prezıdenti Iаnn Lekýndy qabyldady.
Qasym-Jomart Toqaev pen «Meta» kompanııasynyń vıse-prezıdenti, jasandy ıntellektini zertteý bóliminiń (FAIR) bas ǵylymı jetekshisi Iаnn Lekýn ınnovasııalyq tehnologııalardy damytý jáne qoldaný jóninde pikir almasty.
Memleket basshysy neırojeliler salasyndaǵy Iаnn Lekýnnyń jańashyl jetistikterin joǵary baǵalap, onyń jasandy ıntellektini damytýǵa qosqan úlesin atap ótti.
Prezıdent Qazaqstannyń jappaı sıfrlandyrýdy jáne jasandy ıntellektini damýdyń basty faktory retinde keńinen qoldanýdy qarastyryp, derbes JI ekojúıesi men Qazaq tiliniń úlken tildik modelin (KazLLM) jasaqtaýǵa kúsh salyp jatqanyn jetkizdi.
Qasym-Jomart Toqaev «Meta Platforms Inc» kompanııasymen Qazaqstanda JI tehnologııalaryn damytý boıynsha birlesken akselerasııalyq baǵdarlamany iske qosý jónindegi kelisimge qol qoıylýyn quptap, tehnologııa alybymen ózara tıimdi seriktestikti odan ári nyǵaıtýǵa daıyn ekenin rastady.
Baıypty dıalog jalǵasady
Memleket basshysy Qasym-Jomart Toqaev AQSh Prezıdentiniń Ońtústik jáne Ortalyq Azııadaǵy arnaýly ókili Serdjıo Gordy qabyldady.
Qasym-Jomart Toqaev Serdjıo Gordy AQSh Prezıdentiniń Ońtústik jáne Ortalyq Azııa isteri boıynsha arnaýly ókili jáne AQSh-tyń Úndistandaǵy elshisi laýazymyna taǵaıyndalýymen quttyqtady. Osy rette Qazaqstan Úkimeti onyń mıssııasyna jan-jaqty qoldaý kórsetetinin aıtty.
Memleket basshysy qazaq-amerıka strategııalyq seriktestigin naqty jetistiktermen odan ári nyǵaıtýǵa baǵyttalǵan dıalogti jalǵastyrýǵa daıyn ekenin jetkizdi.
Áńgimelesý barysynda saýda-ekonomıkalyq yqpaldastyqty damytýǵa mán berildi. Memleket basshysy elimiz AQSh-tyń Ortalyq Azııadaǵy negizgi ekonomıkalyq seriktesi sanalatynyn atap ótti.
Qasym-Jomart Toqaev pen Serdjıo Gor kún tártibindegi halyqaralyq jáne óńirlik ózekti máseleler jóninde pikir almasty.
«Wabtec» kompanııasymen birqatar kelisimge qol qoıyldy
Memleket basshysynyń Nıý-Iork qalasyna resmı sapary aıasynda AQSh Saýda mınıstri Govard Latnıktiń qatysýymen amerıkalyq «Wabtec» kompanııasymen jalpy somasy 4,2 mlrd dollarǵa jýyq kelisimge qol qoıý rásimi ótti.
Atalǵan qujatta Qazaqstanda tehnıkalyq turǵydan jetildirilgen 300 lokomotıv shyǵarý jáne oǵan servıstik qyzmet kórsetý qarastyrylǵan.
Kólik tehnologııasy boıynsha álemdegi kóshbasshy kompanııa elimizdiń temirjol salasyn jańǵyrtý isinde negizgi seriktesterimizdiń biri sanalady. 2009 jyldan beri Astanada «Wabtec Kazakhstan» lokomotıv qurastyrý zaýyty tabysty jumys istep keledi. Osy aralyqta kompanııa óndiriske 230 mln dollardan asa ınvestısııa quıdy. Kásiporyn búginge deıin «Qazaqstan temir jolyna» jáne eksportqa arnalǵan 600-den asa lokomotıv qurastyrdy. О́ndiristiń lokalızasııa deńgeıi 45 paıyzǵa jetti.
Byltyr shilde aıynda «Wabtec» kompanııasy elimizde ınnovasııalardy engizip, kadr daıarlaýǵa úles qosatyn tehnologııalyq jáne ınjenerlik ortalyǵyn ashty.
Amerıkalyq bıznes úshin úlken múmkindik
Memleket basshysy Qasym-Jomart Toqaev AQSh Saýda mınıstri Govard Latnıkpen kezdesti.
Memleket basshysy men AQSh Saýda mınıstri ekijaqty saýda-ekonomıkalyq yntymaqtastyqtyń keń kólemdi máselelerin qarastyrdy.
Qasym-Jomart Toqaev elimiz Amerıka Qurama Shtattarymen yqpaldastyqty damytýǵa erekshe mán beretinin atap ótti. AQSh elimizdiń negizgi ınvestısııalyq seriktesteriniń biri sanalady.
Prezıdent Qazaqstanda sheteldik ınvestorlarǵa qolaıly jaǵdaı jasalǵanyn aıtty. Memleket basshysy elimizde amerıkalyq bıznes úshin energetıka, kólik-logıstıka, sıfrlandyrý, aýyl sharýashylyǵy salalarynda úlken múmkindik bar ekenin jetkizdi.
Govard Latnık Qurama Shtattardyń Qazaqstanmen saýda-ekonomıkalyq, ındýstrıaldyq, kólik-logıstıkalyq jáne ınvestısııalyq salalarda birlesken jobalardy odan ári damytýǵa qyzyǵýshylyq tanytatynyna toqtaldy.
Data ortalyq qurylysy qolǵa alynady
Prezıdent Qasym-Jomart Toqaev «Blackstone» kompanııasynyń negizin qalaýshylardyń biri jáne basqarma tóraǵasy Stıven Shvarsmanmen kezdesti.
Qasym-Jomart Toqaev pen Stıven Shvarsman ózara tıimdi ınvestısııalyq yntymaqtastyqtyń basym baǵyttaryn talqylady.
Qazaqstan Prezıdentiniń aıtýynsha, «Blackstone» kompanııasynyń ınfraqurylym men tehnologııany damytýǵa arnalǵan aýqymdy ınvestısııalaý strategııasy elimizdiń ekonomıkany ártaraptandyrý, ınnovasııa men ornyqty damý salalaryndaǵy ulttyq basymdyqtarymen tyǵyz baılanysty.
Memleket basshysy Qazaqstandy tolyq sıfrlyq elge aınaldyrý jóninde strategııalyq mindet qoıǵanyna egjeı-tegjeı toqtaldy.
«Blackstone» kompanııasynyń basshysymen áńgimelesý barysynda Qazaqstanda data ortalyq qurylysy jobasyn birlesip iske asyrý usynyldy. Sondaı-aq elimizdegi qarjy tehnologııalary men jyldam órkendep kele jatqan kompanııalar arqyly aktıvterdi basqarý salasyndaǵy yntymaqtastyq áleýetin qarastyrýǵa nazar aýdaryldy.
«Blackstone» – naryqtyq kapıtaly 218 mlrd dollardan asatyn álemdegi iri ınvestısııalyq kompanııa.
Taýar aınalymyn ulǵaıtý – nazarda
Memleket basshysy Qasym-Jomart Toqaev AQSh Saýda palatasynyń prezıdenti jáne bas atqarýshy dırektory Sıýzann Klarkty qabyldady.
Áńgimelesý barysynda ekijaqty taýar aınalymyn ulǵaıtý maqsatynda uzaqmerzimdi yntymaqtastyqty jolǵa qoıý máseleleri talqylandy.
Qasym-Jomart Toqaev jýyrda Qazaqstanda júrgizilgen joǵary deńgeıdegi amerıkalyq saýda-ınvestısııalyq mıssııasynyń qorytyndysyn quptap, elimiz Qurama Shtattardyń Ortalyq Azııadaǵy negizgi seriktesi sanalatynyn atap ótti. Qazaqstan AQSh Úkimetimen jáne iskerlik orta ókilderimen tıimdi yqpaldastyq ornatýǵa beıil. Osy oraıda Qasym-Jomart Toqaev AQSh Prezıdenti Donald Tramppen ótken áńgimelesýdiń, sondaı-aq Saýda mınıstri Govard Latnıkpen, birqatar amerıkalyq iri kompanııalar basshylarymen kezdesýdiń mazmunyn joǵary baǵalady.
AQSh Saýda palatasynyń jetekshisi ekonomıkalyq baılanystardy odan ári keńeıtýdiń aıtarlyqtaı áleýeti bar ekenin rastady.
Qasym-Jomart Toqaev pen Sıýzann Klark ekonomıkanyń túrli sektorynda birlesken jobalardy júzege asyrý keleshegi qarastyrdy.
Ken oryndarynyń keleshegi zerdelendi
Prezıdent Qasym-Jomart Toqaev «ExxonMobil» korporasııasynyń basshysy Darren Výdsty qabyldady.
Memleket basshysy «ExxonMobil» korporasııasynyń basqarma tóraǵasy jáne bas atqarýshy dırektory Darren Výdsqa iltıpat bildirip, Qazaqstannyń munaı-gaz salasyndaǵy negizgi seriktesteriniń birine aınalǵan kommersııalyq uıymmen yntymaqtastyqqa joǵary baǵa berdi.
Qasym-Jomart Toqaev pen Darren Výds kompanııanyń Teńiz jáne Qashaǵan ken oryndaryndaǵy keleshegi jóninde pikir almasty.
Júk tasymaldaý salasyndaǵy baılanys
Memleket basshysy Qasym-Jomart Toqaev «Embraer» kompanııasynyń prezıdenti Fransısko Gomes Netomen kezdesti.
Brazılııalyq «Embraer» avıa qurylys kompanııasy jetekshisimen kezdesýde júk tasymaldaý salasyndaǵy yntymaqtastyq máseleleri talqylandy.
Prezıdent elimizdiń Eýrazııa keńistigindegi negizgi kólik-logıstıkalyq habqa aınalýǵa umtylatynyn jetkizdi.
Áńgimelesý barysynda Qazaqstanda «Embraer» ushaqtaryna tehnıkalyq qyzmet kórsetetin óńirlik servıstik ortalyq ashý perspektıvasy qarastyryldy.
Fransısko Gomes Neto Qazaqstannyń kólik-tranzıttik áleýetine joǵary baǵa berip, ózara tıimdi yntymaqtastyqty jalǵastyrýǵa daıyn ekenin rastady.
Bankter toby qyzmetindegi eń mańyzdy baǵyttardyń biri
Prezıdent Qasym-Jomart Toqaev «Sitigroup» kompanııasynyń bas atqarýshy dırektory Djeın Freızerdi qabyldady.
Kezdesýde elimizdegi aýqymdy jobalardy qarjylandyrý máseleleri talqylandy.
Djeın Freızer Qazaqstanmen aradaǵy seriktestikti bankter toby qyzmetindegi eń mańyzdy baǵyttardyń biri retinde qarastyratynyn jetkizdi.