Qarttar kúnine oraı «Aýyl» partııasynyń Qaraǵandy oblysy boıynsha óńirlik fılıaly «Jasandy ıntellekt jasqa qaramaıdy» taqyrybynda jastar men ardagerlerdiń kezdesýin uıymdastyrdy.
Jıynǵa kelgen qarttarǵa «OpenAI» kompanııasy ázirlegen, jasandy ıntellektige negizdelgen, suraqtarǵa naqty ári mazmundy jaýap beretin aqyldy chat-bot – ChatGPT tanystyryldy. Kópshilik bul «aqyldy» baǵdarlamany qyzyǵýshylyqpen qabyldap, ózderiniń uıaly telefondarynda qoldanyp kórdi. Qosymsha arqyly suraq qoıyp, naqty ári mazmundy jaýap alǵan aqsaqaldar rızashylyqtaryn jetkizip, jańa tehnologııanyń artyqshylyqtaryna kóz jetkizip, tańdanystaryn bildirdi.
Jastar ChatGPT, Google Gemini, Copilot sekildi jasandy ıntellekt platformalarynyń máni men múmkindikteri týraly keńinen baıandap, ardagerlerge ony kúndelikti ómirde qalaı qoldanýǵa bolatyny jóninde naqty mysaldar keltirdi. Jasandy ıntellektiniń qoǵamǵa ákeletin paıdasy, tıimdiligi men yqtımal táýekelderi, qaýipsizdik sharalary jóninde keńinen áńgimeledi. Jańa tehnologııa týraly uǵynyqty túrde ári qoljetimdi formatta aqparat berdi. Olardyń aýyl turǵyndaryna qandaı paıda ákele alatynyn túsindirdi. Jasandy ıntellektige negizdelgen júıelerdiń kómegimen ardagerler kúndelikti ómirde qajetti aqparatty jyldam tabý, medısınalyq keńes alý, áleýmettik qyzmetterge qol jetkizý sekildi baǵyttar boıynsha naqty málimet aldy.
Jıynǵa qatysqan ardager, qalamger Ańǵar Smaǵul qarttardy qadirlep, jańa tehnologııany meńgerýge jol ashqan is-sharany uıymdastyrǵan azamattarǵa alǵysyn bildirdi.
– Biz qart adamdar jańa tehnologııa múmkindikterin úırenýdiń jolyn bilmeı qınalatyn kezderimiz bolady. Búgingi kezdesýde jastar sonyń tıimdi ári tóte jolyn nusqady. Aqyldy aqsaqaldan ǵana emes, jastardan suraıtyn ýaqyt keldi. Prezıdentimizdiń bıylǵy Joldaýynda negizgi taqyryp bolǵan jasandy ıntellektiniń qanshalyqty mańyzdy ekenin jastarymyz bir ǵana kezdesýdiń aıasynda naqty tájirıbede túsindirip berdi, – deıdi ardager jýrnalıst.
«Aýyl» partııasy Qaraǵandy oblysy boıynsha óńirlik fılıalynyń tóraǵasy Rýslan Nıkanovıch aqyldy júıeniń aýyldy tek «turmystyq keńistik» emes, tehnologııalyq múmkindikter keńistigine aınaldyrady deıdi.
«Jasandy ıntellekt aýyl ómirin jeńildetip, sapasyn arttyrýda, atap aıtqanda aýyl sharýashylyǵynda – egistik alqaptardyń jaǵdaıyn monıtorıngteý, maldyń jaı-kúıin baqylaý, aýa raıyn boljaý, ónimdilik deńgeıin arttyrýda, sonymen qatar bilim berýde, densaýlyq saqtaý salasynda, kásipkerlik pen saýdada naqty úles qosa alady. Tehnologııalyq damý adam ómiriniń barlyq salasyna áser etedi. Al aýyldy damytpaı, elimizdi jańǵyrtý múmkin emes. Sol sebepti, «Aýyl» partııasy bul máselege erekshe den qoıyp otyr. Maqsat – aýyl turǵyndaryn jańa zamannyń tilimen sóıletý, sıfrlyq saýattylyqty arttyrý jáne tehnologııany kúndelikti ómirde qoldanýǵa beıimdeý, aýyldy aqparattyq qoǵam kóshinen qaldyrmaý», deıdi partııanyń óńirdegi jetekshisi.
Osy jıyn ıntellektýaldy qondyrǵynyń kómegin tek jastar ǵana emes, ardagerler de ala alatynyn dáleldedi.
Qaraǵandy oblysy