Almaty taý klasterine, Býrabaıǵa taǵysyn-taǵy demalys aımaqtaryna shetelden týrıster kóp bardy degen statıstıkany jıi oqımyz. Endi osyndaı málimetterdi jıyp, dálme-dál esepteý úshin jasandy ıntelekt pen mobıldi derekter kómekke keledi, dep habarlaıdy Egemen.kz.
Qaı óńirge neshe týrıst barǵany, olar qandaı oryndardy aralap, qyzyqtaǵany týraly aqparat týrızmdi damytýdy oılastyrǵan iri kompanııalarǵa ǵana emes, jeke kásipkerlerge de qyzyq. Sebebi qonaqtar týrızmniń qaı baǵytyn durys kórse, eldegi týrıstik kompanııalar sol baǵytta jumys istese eńbek ónedi. Statıstıka neǵurlym naqty bolsa, týrıst jıi baratyn ólkeniń ınfraqurylymyna, qyzmet kórsetý sapasyna soǵyrlym erte kóńil bólýge bolady.
Jýyrda ótken Digital Bridge 2025 halyqaralyq forýmynda týrıstik aǵyndardy baqylaý úshin mobıldi derekterdi paıdalanýǵa arnalǵan paneldik sessııa ótti. Onda Ulttyq statıstıka bıýrosynyń basshysy Maqsat Turlybaev pen «Kazakh Tourism» UK» AQ basqarma tóraǵasynyń mindetin atqarýshy Danıel Serjanuly jasandy ıntellekt pen mobıldi derekterge negizdelgen týrıstik statıstıkanyń jańa modelin engizý týraly habarlady. Jobany Ulttyq statıstıka bıýrosy «Kazakh Tourism» UK AQ, Dúnıejúzilik bank jáne Pozıtıým ókilderiniń qatysýymen iske asyryp jatyr.
Týrıster aǵynyn baqylaıtyn qazirgi júıe tek qonaqúılerde tirkelgen týrısterdi ǵana anyqtaı alady. Sonyń ózinde qonaqúılerdiń barlyǵy tolyq jáne ýaqtyly aqparat bere bermeıdi. Saldarynan keıbir týrıster statıstıkaǵa enbeıdi. Endi mobıldi derekter engizilgen soń, týrıster týraly aqparat tolyǵyp, qonaqtardyń kelgen-ketkeni esepten tys qalmaıdy. Bul qadam –týrıstik aǵyndardy neǵurlym tolyq ári senimdi túrde kórsetýdi qamtamasyz etedi. Sondaı-aq tanymal marshrýttardy, maýsymdyq aýytqýlardy jáne baǵyttardy anyqtaıdy.
Aldyn ala taldaý nátıjeleri uıaly baılanys operatorynyń derekteri resmı statıstıkadan aıtarlyqtaı asyp túsetinin kórsetti. Mysaly, Alakól kýrorttyq aımaǵynda mobıldi derekter 658 myń qonaqty tirkegen. Bul resmı kórsetkishterden 2,4 ese kóp. Balqashta da jaǵdaı shamamen osyndaı. Qonaq úılerde 135 myń qonaq túnese, jańadan engiziletin uıaly baılanys derekteri boıynsha 534 myńnan astam týrıst kelip, qonaq sany 4 ese kóp tirkelgen. Býrabaıda ornalastyrý oryndary boıynsha 346 myń týrıst tirkelse, uıaly baılanys derekteri 1,5 mıllıon týrısti qamtyǵan, ıaǵnı bes ese kóp degen sóz. Osylaısha, elimiz TMD elderi arasynda týrızm statıstıkasyna JI pen mobıldi derekterdi biriktirgen birinshi memleket atanyp otyr. Al tájirıbe qanshalyqty utymdy bolady degen suraqtyń jaýaby ýaqyttyń enshisinde.