Almatyda aýa raıynyń kúrt sýyıýyna baılanysty qala ákiminiń pármenimen jylytý maýsymyn ádettegiden erterek bastaý týraly sheshim qabyldandy. 8 qazannan bastap qalada ortalyq jylytý júıesine qosylý jumystary bastalady, dep habarlaıdy Egemen.kz.
Jylý eń aldymen balabaqsha, mektepter men medısınalyq mekeme syndy áleýmettik nysandarǵa beriledi. Bul týraly Almaty qalasynyń Energetıka jáne sýmen jabdyqtaý basqarmasy habarlady.
Turǵyn úılerdi ortalyq jylý júıesine qosý 10 qazannan bastalady. Jylý berilgen soń PIK pen MIB mamandary úıdiń ishki jylytý júıesin retke keltiredi. Radıatorlar men tikqubyrdan aýa shyǵarylyp, qysym rettelip, páterlerdiń birkelki jylynýyn qamtamasyz etedi.
«AlJJ» kompanııasy aınalym rejımdi iske qosqan. Bul qajet bolǵan jaǵdaıda barlyq aýdanǵa jylýdy jedel berýge múmkindik beredi.
Kásiporyn qysqy kezeńge tolyq daıyn. Yqtımal aqaýlarǵa jedel retke keltirý úshin materıaldar men jabdyqtardyń apattyq qory jasaqtalǵan. 2025-2026 jyldardaǵy jylytý maýsymynda 16 apattyq jáne jóndeý brıgadasy, barlyǵy 220 maman men 56 tehnıka birligi táýlik boıy kezekshilik etedi.