Vetnamnyń ortalyq óńirlerinde tolassyz nóser jaýyn saldarynan joıqyn sý tasqyny men laı kóshkini júrip, kem degende 10 adam kóz jumǵan, dep habarlaıdy Egemen.kz.
Anadolu agenttiginiń habarlaýynsha, eń aýyr jaǵdaı portty Danang qalasynda tirkeldi. Munda sý tasqynynan alty adam mert bolyp, 19 turǵyn túrli jaraqat alǵan. Taǵy tórt adam áli tabylǵan joq. Myńdaǵan turǵyn úı, aýyl sharýashylyǵy alqaptary men úı janýarlary zardap shekken.
Hıýe qalasynda bir adam qaza tapsa, bes jasar qyz bala iz-túzsiz joǵalǵan. Qalada sońǵy táýlikte jaýyn-shashyn mólsheri buryn-sońdy bolmaǵan deńgeıge jetken.
Al, Kýangngaı provınsııasynda 120-dan astam laı kóshkini tirkelip, olardyń saldarynan keminde úsh adam kóz jumǵan. Joldardyń jabylýy saldarynan ondaǵan adam kólikterinde qalyp qoıǵan.
Tabıǵı apat IýNESKO-nyń Búkilálemdik muralar tizimine engen ejelgi Hoıan qalasyn da aınalyp ótpedi. Munda sý deńgeıi kúrt kóterilip, týrısterdi qaıyqpen evakýasııalaýǵa týra kelgen.
Qatty jaýyn Vetnamnyń negizgi kólik qatynasyna da áser etip, el astanasy Hanoı men Hoshımın arasyndaǵy temirjol qozǵalysy ýaqytsha toqtatylǵan. Bul myńdaǵan jolaýshynyń sapar josparyna keri áser etti.