Almaty –1 temirjol vokzaly aýmaǵynda demalys kapsýlalary qarastyrylǵan jańa qonaqúı paıda bolmaq. Bul jóninde Almaty ákimdiginiń baspasóz qyzmeti málim etti, dep jazady Egemen.kz.
Kúni keshe qala ákimi Darhan Satybaldy «Almaty–1» vokzalyndaǵy qaıta jańǵyrtý jumystaryn baryp kórdi. 1974 jyly salynǵan tarıhı nysannyń bastapqy sáýlettik bolmysyn buzbaı júzege asyrylyp jatqan jóndeý barysy týraly aqparat berildi.
Ákimdik bergen derekke qaraǵanda, vokzal kesheninde vızıt-ortalyq, mýzeı keńistigi jáne shaǵyn demalys kapsýlalary bar qonaqúı ashý kózdelip otyr.
Darhan Satybaldy jobanyń qala turǵyndary men jolaýshylar úshin barynsha qolaıly ári qaýipsiz bolýy kerektigin aıtty. Sondaı-aq merdigerlerge jumys sapasy men belgilengen merzimge erekshe jaýapkershilikpen qaraý kerektigin eskertti.
Aıta keteıik, jýyrda úkimet otyrysynda eldegi birqatar vokzaldyń jaǵdaıy synǵa alynǵan edi. Sol jıynda kólik vıse-mınıstri Almaty–1 vokzalyndaǵy jóndeý jumystary nebári 5 paıyz ǵana oryndalǵanyn jetkizgen. Premer-mınıstr Oljas Bektenov bul jaǵdaıdy «ákimdik tarapyndaǵy salǵyrttyq» dep baǵalap, birinshi basshylardyń jeke jaýapty bolatynyn atap ótken.
2025 jyldyń jazynda Almaty–1 jáne Almaty–2 vokzaldary «Qazaqstan temir joly» kompanııasynyń basqarýyna berilgen bolatyn. Ulttyq kompanııa sol kezde eki nysandy da keshendi túrde jańartý josparyn jarııalaǵan.