Álemge áıgili Stenford ýnıversıtetine oqýǵa túsý – dúnıejúziniń túkpir-túkpirindegi mıllıondaǵan jastyń armany. Sol armanǵa jetip qana qoımaı, oqý ornynan ǵylymı jumystaryna qarjylaı qoldaý alý – úlken jetistik.
Shymkent týmasy Ásel Ibadýlla osyndaı bıik belesti baǵyndyryp, el jastaryna jańa óris ashty. Ol – aty ańyzǵa aınalǵan Stenford ýnıversıtetiniń doktorantýrasyna qabyldanǵan tuńǵysh qazaq qyzy.
Ásel Shymkent qalasynda qarapaıym otbasynda dúnıege kelgen. Ákesi – kran júrgizýshisi, anasy – mektep muǵalimi. 8-synypta Nazarbaev Zııatkerlik mektebiniń grantyn jeńip alǵan ol bolashaq armanyna qol jetkizý úshin baryn saldy.
9-synypty aıaqtaǵannan keıin AQSh-qa baryp, Boston qalasynda eki aptalyq oqý baǵdarlamasyna qatysady. Garvard sekildi áıgili ýnıversıtetterdiń atmosferasyn sezingen jas túlektiń júreginde úlken arman oıanady. Kúnderdiń kúninde men de osynda oqımyn degen maqsat týady. Alaıda ata-anasy 16 jastaǵy qyzdaryn jat elge jalǵyz jiberýge batpaıdy, ruqsat bermeıdi. Biraq bul sheshim talapkerdiń arman otyn óshirmeı, bilimin elimizde tereńdetýge ıtermeledi.
Sóıtip, Ásel oqýyn elordadaǵy Nazarbaev ýnıversıtetinde jalǵastyrady. «Bıologııa ǵylymdary» boıynsha úzdik nátıje kórsetip, bakalavrıatty qyzyl dıplommen támamdaıdy. Osylaısha ǵylymı áleýetiniń joǵary ekenin aınalasyna dáleldeıdi. Budan soń oǵan AQSh-tyń alty ýnıversıteti magıstratýraǵa shaqyrtý jiberedi. Biraq ol álemge áıgili Stenford ýnıversıtetin tańdaıdy.
Tańdaǵan ýnıversıteti jas ǵalymnyń áleýetin baǵalap, onyń oqýyna jáne ǵylymı zertteýlerine jalpy 350 mıllıon teńgege jýyq grant bóledi. Bul – tek oqý aqysy emes, bolashaq zertteýshiniń múmkindikterine degen úlken senim.
Ásel Ibadýllanyń bul jetistigi – tabandylyq pen eńbek arqyly kez kelgen qıyndyqty múmkindikke aınaldyrýǵa bolatynyn kórsetetin mysal. Qarapaıym otbasynan shyǵyp, álemdik deńgeıdegi ǵylym ordaǵa joldama alý qazaq jastary áleýetiniń qanshalyqty joǵary ekenin bildiredi.
Áseldiń jetistigi – jas býyn úshin úlken shabyt, qazaq qyzynyń qaısarlyǵy men bilimdiliginiń kórinisi.