Elimizde elektrondyq saýdany odan ári damytý maqsatynda 2027 jylǵa deıingi elektrondyq saýda damýynyń jospary iske asyrylyp jatyr. Salany damytý úshin Kaztrade kompanııasymen birlesip, respýblıka kásipkerlerine elektrondyq saýdany ilgeriletý máseleleri boıynsha onlaın-semınarlar ótkiziledi, dep habarlaıdy Egemen.kz.
Bul týraly Saýda jáne ıntegrasııa mınıstrligi Ishki saýdany damytý departamentiniń dırektory Ańsar Orazalıev aıtty.
Onyń aıtýynsha, otandyq taýarlardyń marketpleısterdegi úlesin keńeıtý úshin «Qazaqstanda jasalǵan» arnaıy bólimderin engizý jumystary júrgizilip jatyr. 2024 jyly elektrondyq saýda alańdary úshin baǵdarlamalyq qamtamasyz etýdi ázirleý jáne súıemeldeý jobalaryn qoldaýǵa arnalǵan syıaqy mólsherlemesin sýbsıdııalaý jáne kepildikter berý túrindegi memlekettik qoldaý qaǵıdalary qabyldandy.
«Otandyq marketpleısterdiń Qytaıdan taýar satyp alýǵa baǵyttalǵan (B2B formaty boıynsha) jańa jobalary iske asyrylyp jatyr. Tikeleı satyp alý deldaldar tizbegin qysqartyp, taýar sanatyna qaraı satyp alý qunyn 10-30%-ǵa tómendetýge múmkindik beredi. Ashyq tarıfter iri ımporttaýshylar tarapynan orynsyz baǵa ósimin shekteýge jaǵdaı jasaıdy», dedi Ańsar Orazalıev.
Vedomstvo ókiliniń aıtýynsha, Ozon jáne Wildberries marketpleısteri Astana men Almatyda jalpy aýdany 291 myń sharshy metr bolatyn úsh fýlfılment ortalyǵyn salý boıynsha ınfraqurylymdyq jobalardy júzege asyryp jatyr. Osyǵan baılanysty bıylǵy 4 qarashada fýlfılment ortalyqtaryna arnalǵan ulttyq standart (saqtaýdan jáne jetkizýden bastap, tapsyrystardy basqarý men taýardy qadaǵalaýǵa deıin) bekitildi. Ol 2026 jylǵy 1 qańtarda kúshine enedi. Standart tek saqtaý prosesterin ǵana emes, taýarlardy ótkizý máselelerin de qamtıdy, bul halyqaralyq tájirıbege sáıkes keledi. Onyń engizilýi saýda salasyna ınvestısııalardyń artýyna jáne elektrondyq kommersııanyń odan ári damýyna yqpal etpek.
«Elektrondyq saýdanyń ulttyq operatory – «Qazposhta» AQ syrtqy elektrondyq saýda salasynda iri halyqaralyq kompanııalar YTO Express jáne JD.com-men birlesken jobalardy iske asyryp jatyr. Osy jobalar aıasynda Almaty oblysynda elektrondyq saýda taýarlaryn óńdeı alatyn úlestirý ortalyǵy salynady, sondaı-aq Ortalyq Azııa men TMD naryqtaryna arnalǵan JD.com platformasynyń qazaq-orys tildi nusqasy iske qosylady», dep málimdedi spıker.
Eske sala keteıik, 2026 jylǵy 10 sáýirde Almatyda Qazaqstannyń rıteıl jáne qarjy sektoryndaǵy jańa tehnologııalarǵa arnalǵan PROFIT Retail & Finance Day konferensııasy ótedi.