Qazir aqparat aıdyny óte jyldam damyp, málimetter men qujattar kóz ilespes qarqynda taralady. Bul jaǵdaı uıymdar men qyzmetkerlerge sybaılas jemqorlyq táýekelderin durys baǵalaý, aldyn alý jáne komplaens talaptaryn saqtaý jaýapkershiligin júkteıdi. Osy rette Freedom Telecom Holding kompanııasynyń komplaens-ofıseri, zań ǵylymdarynyń magıstri Erasyl Járdemov «Qazaq gazetteri» seriktestiginiń uıym qyzmetkerlerine dáris oqyp, óz tájirıbesimen bólisti, dep jazady Egemen.kz.
Sybaılas jemqorlyqqa qarsy komplaens – uıym ishinde táýekelderdi aldyn alý men basqarýdyń mańyzdy quraly. Ol qyzmetkerlerdiń áreketterin zań aıasynda rettep qana qoımaı, uıymnyń bedelin saqtaýǵa múmkindik beredi. Spıkerdiń aıtýynsha, kez kelgen qyzmetker óz áreketinde múddeler qaqtyǵysy men sybaılas jemqorlyqqa baılanysty zańdardy bilýge mindetti.
«Sybaılas jemqorlyqqa qarsy is-qımyl eń birinshi kezekte uıym mádenıeti men qyzmetkerlerdiń adaldyǵyn saqtaýdyń kepili. Kez kelgen faktiniń aldyn almasa, tek zań buzý ǵana emes, uıym bedeline nuqsan keltiredi. Sondyqtan barlyq ishki prosester, satyp alý, kadr jáne basqarý qyzmetteri tıisti komplaens standarttaryna saı júrgizilýi kerek», deıdi Ersyl Járdemov.
Semınar barysynda spıker Tıptik bazalyq baǵyt (TBN-4) jáne uıymdarda ishki sybaılas jemqorlyq táýekelderin taldaý prosedýrasyn egjeı-tegjeıli túsindirdi. Onyń aıtýynsha, ishki taldaý uıymnyń álsiz jáne kúshti tustaryn aıqyndap, yqtımal táýekelderdi anyqtaýǵa múmkindik beredi. Tek táýekelderdi elemeý jaǵdaıynda ǵana korrýpsııa faktileri paıda bolady.
«Ishki taldaý jyl saıyn júrgizilýi tıis. Qujattar men prosesterdi tekserý arqyly múddeler qaqtyǵysy, satyp alý tártibi, kadrlyq sheshimder men basqarýshylyq áreketterdegi kemshilikter anyqtalady. Eger bári tártip boıynsha oryndalsa, sybaılas jemqorlyq qaýpi aıtarlyqtaı tómendeıdi», dedi spıker.
Múddeler qaqtyǵysy – sybaılas jemqorlyqqa tikeleı yqpal etetin negizgi faktorlardyń biri. Járdemovtyń aıtýynsha, bul tek týystyq qatynastarǵa ǵana qatysty emes, qyzmetkerdiń ózine qatysty kompanııamen mámile jasaýy nemese uıym ishinde sheshim qabyldaý kezinde jeke qyzyǵýshylyqqa boı aldyrýy da qaqtyǵys bolyp sanalady.
Sondaı-aq spıker jańa deklarasııa túrleri men zańnamalyq ózgeristerdi túsindirdi. Qazir basshylar men olardyń orynbasarlary úshin engizilgen deklarasııalar uıymnyń resmı saıtynda ashyq jarııalanýy tıis. Bul basshylardyń áreketterin qoǵamdyq baqylaýǵa alyp, uıymnyń qarjylyq jáne basqarýshylyq sheshimderin móldir etedi.
«Barlyq uıymdar men qyzmetkerler múddeler qaqtyǵysy men sybaılas jemqorlyq táýekelderin durys baǵalap, komplaens talaptaryn oryndaýy qajet. Bul uıymnyń bedelin saqtap qana qoımaı, qoǵam aldyndaǵy senimge de nuqsan keltirmeıdi», dep qorytyndylady Erasyl Járdemov.
Semınar sońynda qatysýshylar tájirıbelik keńester men baǵyttar boıynsha pikir almasty. Is-shara komplaens salasynda naqty sharalardy engizý men uıym mádenıetin kúsheıtýge baǵyttalǵan mańyzdy qadam boldy.