Bıznesti memlekettik qoldaý sharalarynyń tıimdiligin arttyrý mańyzdy bolyp otyr. Bul týraly Memleket basshysy Qasym-Jomart Toqaev respýblıkalyq kórme-konkýrsynyń jeńimpazdaryn marapattaý rásiminde aıtty, dep jazady Egemen.kz Aqordanyń baspasóz qyzmetine silteme jasap.
Q.Toqaev óz sózinde eksport naryǵynda básekege túse alatyn, otandyq shıkizatty paıdalanatyn, sondaı-aq ozyq tehnologııalar men ınnovasııalar transferimen aınalysatyn kásiporyndarǵa basymdyq berilýge tıis ekenin atap ótti.
«Bıyl «Báıterek» holdıngi arqyly shaǵyn jáne orta bıznesti qoldaý kólemi shamamen eki trıllıon teńgege jetti. Tikeleı sýbsıdııalaýdan góri kepildik berý quraldaryna kóshtik. Osy maqsatta meniń tapsyrmammen «Damý» qory janynan shaǵyn jáne orta bızneske, sondaı-aq iri ınvestısııalyq jobalarǵa arnalǵan eki kepildik qory quryldy. Atalǵan baǵyt aıasynda 2229 jobaǵa jalpy somasy 400 mıllıard teńgeden astam kredıt berildi. Onyń ishinde 220 mıllıard teńgeden astamy memlekettik kepildikpen qamtamasyz etildi», dedi Qasym-Jomart Toqaev.