Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen ınflıasııany turaqtandyrý jónindegi kezekti keńes ótti. Onda negizgi azyq-túlik pen azyq-túlik emes taýarlar baǵasyna qatysty másele talqylandy.
Qarasha aıynda qazanmen salystyrǵanda azyq-túlik emes taýarlar baǵasynyń ósimi 0,9%-ǵa deıin baıaýlady, al azyq-túlik ónimderiniń baǵasy ótken aı deńgeıinde (1%) saqtaldy. Áleýmettik mańyzy bar azyq-túlik taýarlaryna arnalǵan baǵa ındeksi keıingi tórt apta boıy ózgerissiz qalyp otyr.
Serik Jumanǵarın jylyjaı kókónisteriniń, ásirese qııar men qyzanaqtyń maýsymdyq qymbattaýyn eskere otyryp, shekaradaǵy ótkizý beketterinde túrikmen kókónisterine shuǵyl túrde «jasyl dálizder» uıymdastyrýdy tapsyrdy. Bul shara, ásirese, jylyjaı óndirisi jetkiliksiz aımaqtardy qoljetimdi baǵadaǵy kókónistermen turaqty qamtamasyz etýge baǵyttalǵan.
Jańa jyl merekesi qarsańynda, ıaǵnı 22–31 jeltoqsan aralyǵynda eldegi sýpermarketterde «Bereke fest» aksııasy bastalady. Aksııa aıasynda fermerlerden tikeleı jetkizilgen áleýmettik mańyzy bar taýarlar arzandatylǵan baǵamen satylady. Sonymen qatar óńirlerde aýyl sharýashylyǵy jáne jańajyldyq jármeńke sany artady. Jeltoqsan aıynda elimizdiń barlyq óńirinde 800-den astam jármeńke ótkiziledi. Tek ótken aptada 149 jármeńke uıymdastyryldy. Saýda komıtetine shalǵaı aýdandarǵa, onyń ishinde Mańǵystaý, Ulytaý oblystaryna taýar jetkizýge kómek kórsetý tapsyryldy. Oblysta kúrdeli logıstıka men áleýmettik mańyzy bar azyq-túlik taýarlaryn saqtaýǵa arnalǵan qoımalar tapshy. Osyny eskere otyryp, Serik Jumanǵarın óńirde logıstıkalyq ortalyq qurý mindetin qoıdy. Atalǵan ortalyqtyń qýaty azyq-túliktiń qajetti qoryn saqtaýǵa, logıstıkalyq shyǵyndardy qysqartýǵa ári óńirlik taratý habyn qalyptastyrýǵa múmkindik beredi.
Aýyl sharýashylyǵy vıse-mınıstri Ermek Kenjehanuly áleýmettik mańyzy bar azyq-túlik taýarlary baǵasyn turaqtandyrý tetikteri boıynsha qoldanystaǵy erejelerge tolyqtyrýlar engizý jumysy týraly baıandady.
О́zgerister onlaın monıtorıng júıesin ornatýdy mindetteıdi. Qazir «Qazaqtelekom» AQ Qyzylordada 3 myń sharshy metrlik qoımada qanatqaqty jobany júzege asyryp jatyr. Kelesi jyly áleýmettik kásipkerlik korporasııalardyń qoımalary osyndaı júıelermen jabdyqtalady. Bul áleýmettik mańyzy bar azyq-túlik taýarlardyń qoryn jınaqtaýǵa, onyń sapasyn saqtaýǵa múmkindik beredi. О́zgerister jaqyn arada kúshine enedi.