34 jastaǵy er adam júrek transplantasııasyn kútip respýblıkalyq tizimde turǵan eken. Ota – 5 saǵattan astam ýaqytqa sozylyp, sátti aıaqtalǵan. Mundaı ota – Almaty qalalyq kardıologııalyq ortalyǵynda (QKO) alǵash ret jasalyp otyr, dep jazady Egemen.kz.
Donor áıel kisi
Ota QKO-nyń mýltıdıssıplınarlyq komandasy men University Medical Center (Astana) mamandarynyń birlesýimen jasaldy. Operasııaǵa QKO dırektory Ermaǵambet Qýatbaev pen UMC korporatıvtik qory basqarma tóraǵasy, professor Iýrıı Pıa jetekshilik etti. UMC komandasy áriptesterine qoldaý kórsetý úshin Almatyǵa jedel jetken.
Donor – arterııalyq gıpertenzııanyń aýyr túrimen aýyrǵan, ınsýlt alǵan 50 jastaǵy áıel boldy. Ol Almaty qalalyq ortalyq klınıkalyq aýrýhanasyna shuǵyl jetkizilgen. Dárigerler konsılıýmy mı ólimin anyqtap, qaıtys bolǵannan keıingi donorlyqqa múmkindik bar ekenin rastaǵan. Týystary kelisim bergen soń donorlyq prosess uıymdastyrylǵan.
Barlyq jaǵdaı jasalǵan
Qalalyq kardıologııalyq ortalyqta joǵary tehnologııalyq otalardy júrgizýge barlyq jaǵdaı jasalǵany týraly Densaýlyq saqtaý mınıstrliginde atalyp ótti. Munda bilikti kardıologtar, kardıohırýrgter, anestezıolog-reanımatologtar, perfýzıologtar men ota dasaýǵa septesetin meıirbıkeler jumys isteıdi. Zamanaýı dıagnostıkalyq jáne emdeý ádisteri engizilgen, halyqaralyq standarttarǵa saı jabdyqtar qoldanylady.
Naýqastyń úndeýi
«Adamdarǵa úndeý jasaǵym keledi: energetıkalyq sýsyn ishpeńizder. Meniń aýrýym dál solardan bastaldy. Aldymen kúnine 1 bótelke ishetinmin, keıin kúnine 8-10 energetıkke deıin jetti. Buǵan mán bermedim, aýyr dıagnoz qoıylǵanǵa deıin. Búgin dárigerlerdiń arqasynda tirimin. Endi densaýlyqqa qanshalyqty muqııat qaraý kerek ekenin túsindim», dedi naýqas.
Aýrýhanadan shyqqannan keıin naýqas turǵylyqty jeri boıynsha emhanaǵa tirkelip, dınamıkalyq baqylaýda bolady. Júrek transplantasııasyn qosa alǵanda, stasıonarlyq em, shyǵarylǵannan keıin qajetti dári-dármekpen qamtamasyz etý, ári qaraıǵy ońaltý men baqylaý memleket esebinen, tegin medısınalyq qyzmetterdiń kepildik berilgen kólemi (TMKKK) sheńberinde kórsetiledi.