Memlekettik qyzmet isteri agenttiginiń tóraǵasy Darhan Jazyqbaı ortalyq memlekettik organdardyń qyzmetshilerimen memlekettik qyzmetti damytý baǵyttary men aldaǵy basym mindetterin talqylaýǵa arnalǵan kezdesý ótkizdi, dep habarlaıdy Egemen.kz.
Kezdesýde Memleket basshysynyń Ulttyq quryltaıdyńV otyrysynda aıqyndaǵan baǵdarlary aıasynda memlekettik sektordaǵy uıymdastyrýshylyq mádenıetti jańǵyrtý máseleleri qaraldy. Atalǵan ózgerister memlekettik apparattyń tıimdiligin arttyrýǵa jáne qoǵam senimin nyǵaıtýǵa arnalǵan.
Agenttik tóraǵasy memlekettik basqarý júıesin jetildirý, adamǵa baǵdarlanǵan servıstik apparatty qalyptastyrý jáne memlekettik qyzmetterdiń sapasyn arttyrý Agenttiktiń negizgi basymdyqtary ekenin atap ótti. Sondaı-aq «Zań men tártip», «Halyq únine qulaq asatyn memleket», «Adal azamat» qaǵıdattaryn ornyqtyrý Ádiletti Qazaqstandy qalyptastyrýdyń ınstıtýsıonaldyq negizi retinde belgilendi.
Kezdesý barysynda memlekettik qyzmettiń gıbrıdti modelin engizý, jeke jáne kvazımemlekettik sektordan kásibı kadrlardy tartý, sondaı-aq «E-qyzmet» sıfrlyq irikteý júıesi arqyly ashyqtyq pen merıtokratııany kúsheıtý jónindegi sharalar tanystyryldy.
Darhan Jazyqbaı memlekettik qyzmetshi kásibı, jaýapty jáne qoǵam senimine ıe tulǵa bolýy tıis ekenin atap ótip, ashyq, ádil jáne adamǵa baǵdarlanǵan memlekettik qyzmettiń jańa úlgisin qalyptastyrýǵa belsendi qatysýǵa shaqyrdy.
Aıta keteıik, buǵan deıin elimizde memlekettik aqparattyq júıelerdi biryńǵaı sıfrlyq platformaǵa kezeń-kezeńimen kóshirý bastalǵanyn habarlaǵan edik.