Syrtqy ister mınıstrliginiń resmı ókili Asqar Abdrahmanov keshe buqaralyq aqparat quraldary ókilderimen brıfıng ótkizip, osy aptada ótetin basty sharalarmen tanystyrdy.
Resmı ókildiń málim etýinshe, 19 tamyz kúni L.N.Gýmılev atyndaǵy Eýrazııa ulttyq ýnıversıteti janyndaǵy Halyqaralyq gýmanıtarlyq ortalyq óz jumysyn bastaıdy. Onyń ashylýyna Ortalyq Azııadaǵy Qyzyl Krest halyqaralyq komıteti men elimizdiń syrtqy saıasat vedomstvosynyń ókilderi qatysady. Al 20-22 tamyz aralyǵynda Memleket basshysy Nursultan Nazarbaev Armenııada ótetin Ujymdyq qaýipsizdik sharty uıymyna múshe memleketter basshylarynyń beıresmı kezdesýine qatysady dep kútilýde.
Bul kezdesý barysynda Ujymdyq qaýipsizdik sharty uıymy sheńberinde daǵdarystyq jaǵdaılarǵa laıyqty jaýap berýdiń tıimdi júıesin qurý jónindegi usynystar talqyǵa salynady. Sondaı-aq Qyrǵyzstandaǵy jaǵdaıdy turaqtandyrýǵa yqpal etetin sharalardyń barysy pysyqtalmaq.
Resmı ókil, jýrnalısterdiń suraǵyna oraı bergen jaýabynda ústimizdegi jyldyń 1-2 jeltoqsanyna josparlanyp otyrǵan EQYU-ǵa memleketter múshe basshylarynyń sammıtine daıyndyq qyzý júrip jatqandyǵyn jetkizdi. Qazirgi tańda Uıymnyń Venadaǵy shtab-páterinde belsendi konsýltasııalar oryn alyp, aldaǵy sammıttiń kún tártibi men uıymdastyrýshylyq máseleleri boıynsha pysyqtaý jumystary jan-jaqty júrgizilýde.
“Egemen-aqparat”.