Jaqsy aýdanyndaǵy “TNK” agrofırmasynyń basshysy, belgili kásipker Batyr Ýálıev óńirdegi áleýmettik serpiliske eleýli úles qosyp júrgen azamat. Onyń bastamasymen aýylda zamanaýı sport mektebi ashylyp, salamatty ómir salty qalyptasyp keledi. Basqasyn aıtpaǵannyń ózinde, munda álem jáne Azııa chempıondary tárbıelenip shyqqanynyń ózi barshamyzǵa mereı.
Jergilikti kásipker ótken juma kúni jurtshylyqty 800 adamǵa laıyqtalǵan jańa meshittiń ashylý saltanatyna shaqyrdy. Oǵan oblys ákiminiń birinshi orynbasary Qadyrhan Otarov qatysyp, jamaǵatty Ramazan aıynyń sharapatty kúnimen quttyqtady. Kúmbezdi meshitte Qazaqstan musylmandary dinı basqarmasynyń ókili, Naýan haziret atyndaǵy Kókshetaý meshitiniń bas ımamy Qanat Qydyrmın jáne aýdan ımamy Bolat Turǵanuly ýaǵyz aıtyp, bizdiń elde de musylmandyq jol adamdardyń kúndelikti tirshilik úrdisine aınalatynyna senim bildirdi.
Eldi ımandylyqqa tárbıeleýdiń bir oshaǵy sanalatyn meshittiń ishi jamaǵatqa toly bolýyna tilektestik bildirgen Batyr Ýálıev aýdan ımamyna jańa “Vaz-2107” avtokóliginiń kiltin tapsyrdy.
Baqbergen AMALBEK. Aqmola oblysy.