Eldi meken jańa ataýǵa ıe boldy.
Qyzyljar aýdanyna qarasty Elıtnoe selosy oblys ortalyǵyna jaqyn ári jol boıyna ornalasqan.
50 úıli eldi mekenniń mártebesin osyndaǵy Soltústik Qazaqstan mal sharýashylyǵy ǵylymı-zertteý ınstıtýty kótere túsetin. Endi, mine, aýdan ákimdigi men máslıhattyń birlesken sheshimimen Elıtnoe selosy Báıterek aýyly bolyp ózgerip, jańa ataýǵa ıe boldy. Byltyr osy mańǵa shetelden kelgen aǵaıyndarymyz úshin 23 úı salynyp, jurtshylyq arasynda qulaqqa jaǵymdy estiletin Báıterek aýyly atanyp ketken bolatyn. Bıyl “Nurly kósh” memlekettik baǵdarlamasy aıasynda 140 úıdiń qadasy qaǵylyp, respýblıkalyq qazynadan bólingen qarajattyń 350 mıllıon teńgesi ıgerildi. Munda qurylys jumystarymen 300-ge jýyq adam aınalysady.
О́mir ESQALI. Soltústik Qazaqstan oblysy.
Zań talaptary qatań qadaǵalanady
Oblys ákimi Bolatbek Qýandyqovtyń tóraǵalyǵymen “Batys Eýropa – Batys Qytaı” halyqaralyq dálizi qurylysynyń júzege asyrylý barysyna qatysty keńeıtilgen májilis ótkizildi. Májilis barysynda ǵasyr jobasyna teńestirilip otyrǵan halyqaralyq mańyzy zor qurylystyń aımaqta júzege asyrylý barysy jan-jaqty talqylanyp, kúrdeli máselelerdi sheshýdiń joldary qarastyryldy. Atap aıtqanda, halyqaralyq jol qurylysynyń aımaqqa tıisti bóligin salýshy merdiger kompanııalar tarapynan oryn alyp otyrǵan zań buzýshylyqtardy boldyrmaý tıisti sala basshylaryna qatań tapsyryldy.
Erkin ÁBIL. Qyzylorda.
ÁLEÝMETTIK-KÁSIPKERLIK KORPORASIIа QURYLDY
Jambyl oblysy ákimdiginiń sheshimimen “Taraz” áleýmettik-kásipkerlik korporasııasy” AQ qurylyp, dırektorlar keńesiniń alǵashqy jınalysy bolyp ótti. Onda kópshilik daýyspen dırektorlar keńesiniń tóraǵalyǵyna oblys ákiminiń orynbasary Muratbaı Joldasbaev saılandy. “Taraz” ÁKK” AQ qurý týraly tııanaqty sheshim “ÁKK “Ońtústik” UK” AQ aksıonerleriniń jalpy jınalysynan soń, ıaǵnı aktıvteriniń úshten birin jańadan qurylǵan korporasııaǵa ótkizgennen keıin qabyldandy. Endi óziniń jeke jarǵylyq qory bar AQ-tyń birden-bir aksıoneri Jambyl oblysynyń ákimdigi bolyp tabylady. ÁKK mindeti – memlekettik jáne jeke resýrstardyń múddelerin bir arnaǵa toǵystyra otyryp, óńirdiń ekonomıkalyq damýyna aıtarlyqtaı úles qosý.
Kósemáli SÁTTIBAIULY. Jambyl oblysy.
Aýyl jastary eldiń bolashaǵy úshin
Qashyr aýdanynyń ortalyǵy Tereńkólde oblysta turatyn aýyl jastarynyń basyn qosqan forým boldy. Bıyl ekinshi ret ótkizilip otyrǵan bul jıynǵa ár aýdan, aýyldan týǵan jeri úshin aýylynda qalyp nemese joǵary oqý ornyn bitirip kelip eńbek etip júrgen jastar keldi. Forýmdy elimizde qurylǵan “Aýyl jastary odaǵynyń” jergilikti bólimshesi uıymdastyrypty.Aýyl jastarynyń eldiń bolashaq tirligi úshin atqaratyn jumystaryna saı qandaı talap-tilekteri men usynystary baryn oblys ákiminiń orynbasary Álııa Ǵalymova tyńdady. Aýyl jastaryna eldiń bolashaǵy úshin birge bolaıyq dep úndeý qabyldandy. Forýmnan soń jınalǵandar aýdanda atqarylyp jatqan jaqsy istermen tanysty.
Farıda BYQAI. Pavlodar oblysy.
Dástúrli jeksenbilik jármeńkeler
Úrjar aýdanynda kúz aıy bastalmaı jatyp dástúrli jeksenbilik jármeńkeler bastalyp ketti. Onda aýyl sharýashylyǵy ónimderi túr-túrimen molynan satylýda. Jáne mundaǵy baǵa bazar narqynan birshama tómen. Aıtalyq, bazarda sıyr eti – 650, al kartop 100 teńge bolsa, jármeńkede ol tıisinshe – 550 jáne 30 teńgeden satylýda. – Aýdanda mal basyn kóbeıtýmen birge, ónim sapasyn arttyrýǵa kúsh salyp otyrmyz, – deıdi atalǵan aýdan ákimi Baýyrjan Janaqov. Jármeńke kúnderi aýdan ónerpazdarynyń kúshimen arnaıy konserttik baǵdarlamalar usynylýda. Sondyqtan jergilikti halyq bıylǵy jármeńkege dán rıza.
Dáýlet SEISENULY. Shyǵys Qazaqstan oblysy.
Baǵdarshamdar qozǵalysty jeńildetti
Abaı shaǵyn qala bolǵandyqtan, ondaǵy jol qozǵalysyn rettep turýǵa baǵdarshamdar qajetsinbeı kelgen edi. Keıingi jyldarda kólik kóbeıdi, shahar ósip keledi. О́mirdiń ózi usynǵan talapqa sáıkes ortalyq kósheler túıisterine baǵdarshamdar ornatý máselesi aýdan ákiminiń turǵyndarmen jyl basyndaǵy kezdesýlerinde kóterilgen bolatyn. Olardyń tilekteri qabyl alynyp, osy maqsat úshin jergilikti bıýdjetten 7,6 mıllıon teńge bólindi. Mine, endi uly aqyn atyndaǵy aýdan ortalyǵynda baǵdarshamdar jumys isteı bastady. Sonyń arqasynda buǵan deıingideı júrgizýshilerdiń bir-birine jol bermeýi sap tyıyldy. Júrginshilerdiń kóshelerdi qıyp ótýi jeńildedi. Ásirese, oqýshylardyń mektepterge baryp-qaıtýyna ata-analar qobaljymaıtyndaı boldy.
Aıqyn NESIPBAI. Qaraǵandy oblysy.
Lısakovtyq “Dańqtyń bir mezeti”
Lısakov qalasynda jarty jyldan beri “Dańqtyń bir mezeti” dýman-baǵdarlamasy jalǵasyp kelgen bolatyn. Onyń fınalynda kórermendi ónerimen tańǵaldyrǵan lısakovtyq anyqtaldy. Baǵdarlamanyń máresinde tańdalyp alynǵan 20 ónerpaz óner kórsetti. Sonyń arasynda Olga Kovaleva lısakovtyqtardy ánimen tańǵaldyryp, birinshi oryndy ıelendi. Munan keıingi júldeli oryndardy sırk ónerin kórsetkender men akkordeonnyń qulaǵynda oınaǵan mýzykanttar ıelendi. Bul sharany qalalyq mádenıet jáne tilderdi damytý bólimi Reseı arnasyna eliktep ótkizgenmen, mundaı baıqaý-dýman qalalyqtardyń shyǵarmashylyqpen aınalysýyna yqpal etetindigin aıtady.
Názıra JÁRIMBETOVA. Qostanaı oblysy.