Búginde baıypty isterdi qolǵa alyp, qarqyndy damý jolyna túsken Jańatas qalasynda sý tapshy. Qala turǵyndary aýyzsý zárýligin sezinýde. Bulaı deıtinimiz, qaladaǵy kóp qabatty úılerge sý tańerteńgi saǵat 7 men 12-niń aralyǵynda jáne keshki 18 ben 23 aralyǵynda ǵana beriledi. Al adam úshin sýdyń qajettiligi táýliktiń qaı mezgilinde bolsa da týyndaıtyny daýsyz. Turǵyndar bolsa tańerteń úıden shyǵarda bos ydystarǵa, tipti, vannaǵa sý toltyryp ketetinderin aıtady. Shynynda da, olaı etpeske amaly taǵy joq. Al aýdannyń damý kórsetkishteri men qol jetkizgen tabystary baıandalǵan aýdan ákiminiń esebinde bul máseleni Jańatas qalasyndaǵy «Aıgólek» balabaqshasynyń tárbıeshisi Olga Kasapkına kóteripti. Árıne, bul jalǵyz ǵana adamnyń emes, búkil jańatastyqtardyń tilegi ári jergilikti bılikke saýaly. «Sýdyń da suraýy bar» ekenin bilgen halyq sýdy tirshilik kózine balaǵan. Al qala adamdaryna ol tipti aýadaı qajet.
Aýdan ákiminiń orynbasary Bergen Omarbek bul másele jýyq arada sheshimin tabatyndyǵyn aıtady. Sebebi, osydan alty jyl buryn turǵyndardyń suranysyn qanaǵattandyrý maqsatynda naqty joba da qolǵa alynypty. Jobanyń smetalyq quny 2 mıllıard 227 mıllıon teńgeni quraıdy eken. Degenmen, «Sý qubyrlaryn jańǵyrtý» baǵdarlamasynyń eki kezeńi boıynsha bul maqsatqa 2011 jyly 500 mıllıon, 2012 jyly 859 mıllıon, al 2015 jyly 442 mıllıon 424 myń teńge qarajat bólinip, ıgerilgen. О́tken jyly 352 mıllıon 370 myń teńge qarastyrylǵan. Endi respýblıkalyq, oblystyq bıýdjetten bólingen bul somalarǵa jumys atqarylyp jatqanyn aıtqan B.Omarbek aýdandaǵy taýly aımaqtar Kópbulaq pen Búrkittiden 84 shaqyrym sý qubyrlarynyń tartylyp otyrǵanyn málimdedi. Aıta keteıik, bul jumys 2011 jyly bastalǵan.
Al turǵyndar úshin bul máseleniń bári alty jyldan beri baýyn tapsa da, baılaýyn tappaǵan dúnıe bolyp kórinip tur. Bárinen de olar úılerine táýliktiń barlyq mezgilinde sý kelip turǵanyn qalaıdy.
Kezinde kúlli elge óndirisimen aty shyqqan Jańatas qalasy búginde sý máselesinen tarshylyq kórip otyr degenge sený qıyn. Biraq báribir aqıqatty aınalyp ótýge bolmaıdy. Endi talaı jyldan beri «jyr» bolyp kele jatqan sý máselesin aýdan ákiminiń orynbasary aǵymdaǵy jyldyń birinshi jartyjyldyǵynda sheshiledi dep otyr. Sonymen qatar, turǵyndarǵa táýligine sý segiz saǵattan berilgen kúnniń ózinde halyq qaladaǵy «Jańatas-Sý-Jylý» mekemesine 3 mıllıon 200 myń teńge qaryz eken. «Eger sýdy táýligine bersek, halyq ony tóleı almaıdy», deıdi B.Omarbek.
Birinshi jartyjyldyqtyń bitýine de eki aıdan sál ǵana astam ýaqyt qaldy. Qalyń qardyń kóbesi sógilip, kóktem minezin tanytqan shaqqa da kýá boldyq. Bul ýaqytta tirshiliktiń oıanyp, túrlene túsetini aqıqat. Endi Jańatas jaqtan da jaǵymdy habar bolyp qalatyn kún alys emes sııaqty. Kelgenine kóp bola qoımasa da kóptiń kókeıinde jaqsy pikir qaldyryp úlgergen aýdan ákimi Balabek Narbaev sý máselesin jolǵa qoıady degen senim bar.
Hamıt ESAMAN,
«Egemen Qazaqstan»
Jambyl oblysy
