Osy maqsatta Astanamyzda jyl saıyn ártúrli sporttyq alańdar salynyp, turǵyndar ıgiligine berilýde. Sonymen qatar, salamatty ómir saltyn nasıhattaý maqsatynda, jastardy sportqa baýlý úshin elordada kópshilikke arnalǵan saıystar men sporttyq festıvaldar jıi ótkizilip turady. Búginde bas qalada eresekterge de, balalarǵa da sportpen shuǵyldanýǵa arnalǵan irili-usaqty 600-den astam sporttyq nysan jumys istep tur.
Sonyń biri – «Astana» sport kesheni. Bul sport nysany qala turǵyndaryna basseın men jattyǵý zalyn usynady. Sonymen qatar, balalar skalodrom, fýtbol jáne basketbol men voleıbol úıirmelerine jazylyp, úlkender jaǵy oıyn alańdaryn jalǵa alyp, jattyǵýlaryna bolady. Sporttyq seksııalardan kıkboksıng, karate, boks jáne t.b. bar. Bir aıta keterligi, jaz maýsymynda «Astana» sport kesheni oqýshylar sekildi jazǵy demalysqa shyǵady. Sport keshenine jaz mezgilinde tek úlkender men jalǵa alýshylar ǵana jattyǵyp, denesin shynyqtyrady.
Sonymen qatar, sport kesheninde jattyǵý men basseın zaly bar. Balalar úshin jattyǵý zalyna jazylý aıyna orta eseppen 4500 teńge bolsa, eresekter úshin 8500 teńge. Sonymen qatar, ár aıdyń sońǵy kúninde zeınetkerler men stýdentter zalda tegin jattyǵa alady. Júzý basseıninde balalar toppen jattyqsa aıyna 13000 teńge, al jekeleı jattyqsa 18000 teńge tóleıdi. Úlkender úshin toppen jattyǵý 18000 teńge, jekeleı jattyǵý úshin 20000 teńge.
Sport keshenderi úshin standartty bolyp tabylatyn júzý, fıtnes, dzıýdo, aıkıdo, djıý-djıtsý, ózin-ózi qorǵaý sııaqty sport túrlerimen «Qazaqstan» sport saraıynda aınalysýǵa bolady. «Arys» boks klýby seksııalar tiziminde erekshe oryn alady. Onda toptyq jáne jeke daıyndyq jumystary júrgiziledi. Júzý úıirmesine bir aı qatysý úshin mektep jasyndaǵy balalar men stýdentterge 5000 teńge, al úlkenderge 10 000 teńge kóleminde aqy belgilengen. Bulshyq etińizdi damytyp, deneńizdiń symbatty bolýyn qalasańyz jáne ádemi beıneleýshi qozǵalystar úırengińiz kelse, fıtnes stýdııasyna jazylýǵa bolady. Baǵasy – 7 myń teńge. Balalardy bı toptaryna qabyldaý 4, 5 jastan júrgiziledi. Bı úıirmesinen shyǵys, álem halyqtarynyń, balalar, klýbtyq bıler, strıp plastıka, BreakDance, ıoga, shoý balet (saltanatty keshterde bıleý) bıin úırene alady. Aılyq baǵasy 10000 teńge shamasynda. «Qazaqstan» sport kesheni búgingi kúni Astananyń sporttyq jáne qoǵamdyq ómirinde mańyzdy ról atqarady. Sport kesheni 2002 jyly Elbasy Nursultan Nazarbaevtyń qoldaýymen salynǵanyn aıta ketken jón.
2011 jyly paıdalanýǵa berilgen respýblıkalyq «Saryarqa» velotregi – veloshabandoz shlemi túrinde jasalǵan, erekshe sport ǵımaraty, álemdegi eń úzdik sport keshenderiniń biri retinde tanylǵan. Velotrektiń ishine jattyǵý zaly, trek, muz syrǵanaǵy, boks, gımnastıka, oıyn zaly jáne shaǵyn fýtbol alańdary kiredi. Jattyǵý zalyna 5 jasqa deıingi balalarǵa kirý tegin. Al, mektep oqýshylaryna, stýdentterge jáne zeınetkerlerge bir jolǵy kelýge 50 paıyz jeńildik qarastyrylǵan.
«Alaý» muz aıdyny Astana turǵyndary jaz mezgilinde sportpen shuǵyldaný úshin ortalyq ashqan. Muz aıdyny saraıy sport súıer qaýymǵa mynadaı qyzmet túrlerin usynady: konkımen syrǵanaý (hokkeı alańy), rolıkpen syrǵanaý (400 metrlik konkımen júgirý joly), batýt, ústel tennısi, badmınton, bılıard jáne shaǵyn golf. Bir kúndik tolyq bılettiń baǵasy – 1000 teńge, al, jeńildik bıleti – 500 teńge. Sonymen qatar, 7 jasqa deıingi balalarǵa, I jáne II top múgedekteri, kóp balaly otbasynan shyqqan, kámeletke tolmaǵan balalar jáne balalar úıleriniń tárbıelenýshilerine keshenge kirý tegin. Oqytýshylar, stýdentterge jeńildik bıleti qarastyrylǵan.
Qajymuqan Muńaıtpasov atyndaǵy stadıonnyń esigi jaz maýsymynda jeńil atletıka men fýtbolǵa áýes jandarǵa árdaıym ashyq. Kez kelgen qala turǵyny jeńil atletıka jáne fýtbolmen tegin aınalysa alady. Q.Muńaıtpasov atyndaǵy ortalyq stadıonda halyqaralyq standartqa sáıkes (105h68m) tabıǵı kógaldy fýtbol alańy bar jáne ol 12250 oryndy trıbýnamen jabdyqtalǵan. Fýtboldan basqa, stadıonda 400 metrlik júgirý joly, uzyndyqqa, bıiktikke sekiretin arnaıy oryndar bar.
«Alataý» sport kesheni qala turǵyndaryna olımpııalyq basseın, júgirý joly, eki shaǵyn fýtbol alańy, voleıbol alańy, birneshe jekpe-jek sport túrleri, jattyǵý zalyn jáne birqatar bı úıirmeleri qyzmetin usynady.
Sý sporty túrlerine áýes jandar júzý, sýǵa sekirý, akademııalyq esý, baıdarka men kanoe esý, jelkendi sportqa mamandandyrylǵan «Tolqyn» sport mektebine jazyla alady.
«Dáýlet» sport kesheninde úlken tennısten dárister júrgiziledi. Búginde elimizdegi eń úlken tennıs ortalyǵynda balalar jekeleı jáne top bolyp jattyǵady. Bul jerde tennıstiń álippesin úıretýden bastap, túrli jarystarǵa daıyndap shyǵarady. Sondaı-aq, qala turǵyndary qalaǵan ýaqytynda kortty jalǵa ala alady.
Mine, elorda turǵyndary sportshylar men halyq ıgiligi úshin salynǵan sporttyq ǵımarattardy óz ıgilikteri úshin osylaısha paıdalana alady. Sondaı-aq, qazirgi tańda Astanadaǵy ár turǵyn úı kesheniniń aýlasynda sport alańqaılary bar. Elordada salamatty ómir saltyn ustanamyn degen janǵa barlyq jaǵdaı jasalǵan, tek ózińizde ynta men jiger bolsyn!
Álı Bıtóre,
«Egemen Qazaqstan»
