Onda óńir basshysy Arhımed Muhambetov pen Astana qalasy ákiminiń orynbasary Ermek Amanshaev eki qalanyń bolashaqta tyǵyz áriptestigi jalǵasa bertinin aıtty.
«Biz Astanamyzben maqtanamyz. Astananyń toıy – eldiń toıy. Biz osynaý merekege arnap 100-den astam is-shara tizimin bekittik. Qazirgi ýaqytta bas qala men Qostanaı kóptegen ortaq jobalardy júzege asyryp keledi. Al, búgingi aıtýly shara eki óńirdiń yntymaǵyn nyǵaıta túsedi. Solardyń biri – «Smart Astana» jobasy» dedi oblys ákimi Arhımed Muhambetov.
Astana qalasy ákiminiń orynbasary Ermek Amanshaev ta Qostanaı oblysynyń jetistikterin ózge óńirlerge úlgi etti.
«Qazirgi tańda Astana tyń bastamalar men álemdik is-sharalar ótetin órkenıettiń ordasy bolyp otyr. Biz Astananyń 20 jyldyǵyna oraı osymen elimizdiń altynshy oblysyna atbasyn tirep otyrmyz. Qostanaı oblysy men Astana qalasynyń áriptestik baılanysy budan ári bekı túsetinine senimdimin» dedi Astana basshysynyń orynbasary.
Munan soń óńiraralyq áriptestikti damytýdy kózdegen ekijaqty memorandýmǵa qol qoıý rásimi ótti. Memorandýmdarǵa kásipkerlik, aýylsharýashylyq basqarmalary men «Astana» áleýmettik-kásipkerlik korporasııasy» UK» AQ jáne «Tobyl» áleýmettik-kásipkerlik korporasııasy» UK» AQ, «Astana Innovations» kompanııasy men Qostanaı qalalyq ákimdigi qatysty.
Budan keıin Elordanyń 20 jyldyǵyna oraı oblysta Astana kúnderi jalǵasyn tapty. Osy mádenı sharanyń aıasynda Qostanaı turǵyndary elordalyq ónerpazdardyń «Astanadan aq tilek» atty konsertin tamashalady. E.О́mirzaqov atyndaǵy oblystyq fılarmonııada ótken konsertke Astana qalasy ákiminiń orynbasary E.Amanshaev jáne oblys basshysy A.Muhambetov qatysty. Tobyl aımaǵyna sazdy sálemin joldaı kelgen elordalyq ujymnyń ónerin tamashalaýǵa qostanaılyqtar kóp jınaldy. Sahna shymyldyǵyn «Qorqyt» dástúrli mýzyka toby ashty. Olar qazaq halqynyń birneshe kúıin ulttyq aspaptar tilinde sóıletti. "Shalqyma" halyq bıi ansambliniń óneri de kórermenderdiń kóńilinen shyqty. Qos ujymnyń da elge tanymal, óz isiniń naǵyz sheberleri ekenin aıta ketý kerek. Al konserttiń ekinshi bóliginiń tizginin estradalyq bı ansamblderi, klassıkalyq, estradalyq jáne halyqtyq vokal solısteri aldy. Olardyń da árqaısysy túrli halyqaralyq, respýblıkalyq baıqaýlardyń jeńimpazdary. Astananyń talantty ónerpazdar qostanaılyqtardyń qoshemetine bólendi.
Názıra Járimbet,
«Egemen Qazaqstan»
Qostanaı
