– Bıylǵy Prezıdent kýbogynyń fınalynda Aslanbekpen jolyń túıiskenimen, kezdesýge shyqpadyń. Osy joly sol olqylyqtyń orny tolǵandaı boldy. Jalpy, Shymbergenov seniń kózqarasynda qandaı boksshy?
– Aslanbek áleýeti joǵary, tájirıbeli boksshy. 69 kıloda eki dúrkin el chempıony. Sondyqtan ony osal deýge bolmaıdy. Jazda ótken Prezıdent kýbogynyń fınalynda jaraqat saldarynan judyryqtasa almadym. Nátıjesinde jeńimpaz atanǵan Aslanbek Azııa oıyndaryna attandy.
– Ulttyq quramanyń oqý-jattyǵý jıyndarynda sparrıngke shyqqan bolarsyńdar. Ol kezderi basymdyq kóbine kimde bolýshy edi?
– Biz sparrıngte de óte sırek kezdestik. Sebebi ol «Astana arlandarynyń» sapynda júrgendikten, birlesip ótkizgen jattyǵýlarymyz az boldy. Al jattyǵý barysyndaǵy boksta tolyǵymen ashylmadyq dep oılaımyn. Negizgi qarsylas bolǵandyqtan kóbine jumbaq kúıde júrdik.
– Alda kóptegen jarystar bar. Ekeýara báseke áli de jalǵasary anyq...
- Álbette! Men chempıonat jeńimpazy bolǵanymmen, bul Olımpıadaǵa birden aparatyn joldama emes. Ári dál qazir «Júsipovti Olımpıadaǵa aparamyz» dep eshkim de kesip aıta almaıdy. Sondyqtan, Tokıo týraly aıtýǵa áli erte. О́ıtkeni ishki birinshilikte meniń laıyqty básekelesterim jetkilikti. Únemi úzdik ekenińdi dáleldep otyrmasań, quramadaǵy negizgi ornyńdy joǵaltyp alasyń. Alda mańyzdy týrnırlerde bıikten kórinýge tıistimin.
– Shymbergenov ekeýiń 69 kılonyń ár jyldardaǵy chempıonysyńdar. Degenmen bul joly oǵan qarsy Strelnıkov seni ábden daıyndaǵan tárizdi...
– Árıne, biz rıngke bir-birimizdi tolyq zerttep shyqtyq. Jekpe-jekterin qalt jibermeı qarap, tolyq nazarda ustadyq. Fınalda kóp qatelestim dep oılamaımyn. Aleksandr Strelnıkov meniń ekinshi bapkerim. Qazirgi salmaǵym boıynsha boksshylardy baptaýda oń nátıje kórsetip, Olımpıada chempıonyn shyǵarǵan maman. Alda birlesip jumys istep, aýyz toltyryp aıtarlyqtaı nátıjege jetemiz dep úmittenemin.
– 64 kılodan 69 kıloǵa aýysqanyna eki jyl boldy. Jalpy, salmaq aýystyrýda qıyndyq boldy ma?
– Asa qıyndyq bolǵan joq. Kerisinshe, 64 kıloda salmaq kóp qýyp júrdim. Negizinen 69 kılo meniń turaqty salmaǵym.
– Byltyrǵy Azııa chempıonaty men álem birinshiliginde ózbek boksshysyn utýǵa ne jetispedi?
– Ol kezde Olımpıada júldegerimen bokstasýǵa mende múmkin tájirıbe jetpegen bolar. Jańa salmaqqa aýysqan eki jyldan beri halyqaralyq týrnırlerde baq synap, Germanııa men Fınlıandııada boldyq. Jarystarda múmkindigimizdi kórsetýge tyrystyq.
– Bul chempıonat 2020 jylǵy Olımpıadaǵa negizgi quramdy iriktep berdi deýge bola ma?
– Mundaı sheshim qabyldaýǵa áli erteleý. Chempıon atanǵanymmen bir sátke de bosańsýǵa bolmaıdy. Alda Shymbergenov sııaqty tájirıbeli boksshylarmen talaı aıqastar kútip tur. Sondyqtan bapkerlermen birlese otyryp, 69 kıloda №1 boksshy bolý úshin esh aıanyp qalmaımyn.
Siz ne deısiz?
Myrzaǵalı AITJANOV, bokstan Ulttyq quramanyń bas bapkeri:
– Bul eki boksshy rıngte alǵash ret kezdesip, tóreshiler 5:0 esebimen jeńisti Abylaıǵa berdi. Jekpe-jekke qatysty árkimde túrli pikir bolýy múmkin. Bireý Shymbergenovke jaqtasady, biri Júsipov myqty deıdi. Menińshe, ekeýi de kelesheginen zor úmit kúttiretin, aıryqsha senim artyp otyrǵan sportshylar. Jekpe-jekte ekeýi birinen biri aıtarlyqtaı joǵary bolǵan joq. Teń dárejede ótken kezdesý boldy deýge ábden laıyq. Biraq... Árbir raýndtyń sál basymdylyǵy kózge aıqyn kórinip turdy. Sol basymdylyq Abylaıhannan baıqaldy. Tóreshiler de sony eskerip, jeńisti Júsipovke berdi. Alda jospar túzilgennen keıin, halyqaralyq jarystarǵa aparyp synǵa salamyz. Sol kezde kimniń shyn myqty ekeni kórinedi.
Áńgimelesken
Jankeldi QARJAN,
Aqtaý qalasy
