Ákim Tanıaǵa beker joldamaǵan eken. Ol memlekettik tildi jetik meńgergen, danyshpan Abaıdyń 225 óleńin múdirmesten jatqa oqıtyn bolyp shyqty. Qostanaı aýdanynyń Altyn dala aýylyndaǵy orta mektepti qazaqsha oqyp, О́mirzaq Sultanǵazın atyndaǵy Qostanaı pedagogıkalyq ýnıversıtetin tarıh páni boıynsha támamdaǵan...
Qarapaıym otbasynda tárbıelengen Tanıa – aýdandyq, qalalyq, oblystyq «Abaı oqýlary» baıqaýlarynyń jeńimpazy. Uly aqynnyń Qara sózderin, «Eskendir» poemasyn, sondaı-aq Shákárim shaıyrdyń 80 óleńin de jatqa biledi. Semeıde ótken respýblıkalyq «Abaı oqýlary» baıqaýynan da top jaryp, 2-oryndy jeńip alypty.
Búginde Qostanaıda qazaqsha saırap júrgen Tanıanyń uıaly telefon nómirin taýyp alyp, qońyraýlattyq.
– Qazaqshany qalaı úırenip júrsiń? – dep qyzyǵýshylyq tanyttyq biz salǵan jerden.
– Jergilikti ulttyń balalarymen qazaqy aýylda birge óstim. Qazaq degen aǵaıynnyń shuraıly da baı tilin jan-jaqty meńgerýge talpyndym. Árıne, ýaqyt óte maqsatyma jetý úshin taýdaı talap az etetindigin túsindim. Ol úshin joǵary bilim alyp, tyń izdenister jasaý kerek ekendigin tereń uqtym, – dep aqtaryla ketti qarshadaı qyz.
– Abaı álemi seni nesimen baýrap aldy? – dep jáne suradyq.
– Aqyn óleńderin bala kúnimnen oqyp, jattap óstim. Oǵan úlken ápkem Krıstına úlgi boldy. Ol da «Abaı oqýlaryna» qatysyp, júldeli oryn alyp júrdi. Oblystyq baıqaýdan 1-oryndy jeńip alyp, respýblıkaǵa deıin bardy. 9-synyptan keıin kolledjdi bitirip, qazir otbasyn qurdy. Onyń qorjynynda Abaıdyń 100 óleńi bar, – deıdi Tanıa. – Sol sekildi kishi sińlim de uly aqynnyń birneshe óleńin jatqa aıtady. Al meniń armanym – Abaıdy ıgerý.
Tanıanyń aıtýyna qaraǵanda, ata-anasy Marına men Vıktor Sıtnıkovter otbasyndaǵy alty balany da qazaq mektebine bergen eken.
– Men kóp balaly otbasynda óstim. Ákem Vıktor men anam Marına biz úshin barlyq jaǵdaıdy jasady. Bizdiń bilim alýymyzǵa, eńbekqor bolyp qalyptasýymyzǵa aıryqsha kóńil bóldi. Sondaı qamqorlyqtyń arqasynda otbasyndaǵy alty bala eshteńeden kemdik kórgen joqpyz. Otbasynda tek materıaldyq jaǵdaı ǵana emes, rýhanı jaǵyna da aıryqsha nazar aýdaryldy. Taratyp aıtar bolsam, ózim shańyraqtaǵy tórtinshi perzentpin. О́zimnen úlken eki ápkem, bir aǵam jáne eki inim bar, – deıdi Tanıa.
Qazaqtyń salt-dástúri men ádet-ǵurpyn jastaıynan boıyna sińirip ósken Tatıana jergilikti halyqpen kádimgi týystardaı bolyp aralasyp ketkenin aıtady. Memlekettik tildi tıisti deńgeıde úırenýine tálimgerleri, ıaǵnı ustazdarynyń da sińirgen eńbegi aıryqsha ekendigin jetkizdi.
Tatıana bala kúninen jýrnalıst bolýdy armandapty. Dıktor bolyp, jańalyqtar júrgizsem ǵoı dep te qııaldaǵan. Osylaısha, birde baǵyn synap kórmekke «Qostanaı» telearnasyna barǵan. Bir aıdaı tájirıbe jınaqtapty. Alaıda, jumysqa qabyldanbaı qalǵan. Dıplomy sáıkes kelmegenge uqsaıdy. Biraq jigerli qyz, armany kókke ushsa da, esh moıymaı, qurbylarymen qaladan páter jaldap, McDonald’s-ta ınstrýktor bolyp jumys istep júr eken.
– Mamandyǵym boıynsha jumys izdep kórip edim, taba almadym. Qostanaı aýdanynyń birneshe aýylynyń mektepterine túıindememdi tapsyryp edim, esh jaýap joq. Kúnkórý kerek bolǵan soń, amal joq, osy mekemede jumys istep jatyrmyn. Bul jumysym unaǵanmen, mamandyǵym boıynsha isteýim kerek qoı, – deıdi Abaıdy pir tutatyn sary qyz.
Qostanaılyq sheneýnikter Tanıaǵa tek estafeta joldamaıdy eken, merekelik is-sharalarǵa qatysýǵa shaqyryp turatyn kórinedi.
Bizdińshe, qostanaılyq ákim-qaralar is-sharalarda ózderi kózge túskisi kelip, óleń oqýǵa shaqyra bergenshe, Qostanaı oblysy ákiminiń «Qazaq tilin damytýǵa úles qosqany úshin» atalymynyń laýreaty, kóp balaly otbasynan shyqqan talapty jas Tatıana Sıtnıkovany barynsha qoldap, mamandyǵy boıynsha jumys taýyp bermeı me?!.
