«Búgin koronavırýs ınfeksııasyn juqtyrǵan bir jaǵdaı tirkeldi. Anyqtalǵan naýqastardyń arasynda Reseı men Qazaqstannyń ózge óńirlerinde jumys isteıtin aqtóbelikter bar. 14 adam karantın stasıonarynda. 585 medısına qyzmetkerine vaksına egildi», dedi oblys ákiminiń birinshi orynbasary Nurjaýǵan Qalaýov.
Koronavırýs ınfeksııasynyń bolýy múmkin ekinshi tolqynyna daıyndalý maqsatynda óńirde barlyq shara qabyldandy: qajet bolǵan jaǵdaıda tósek oryn sany 445-ten 3603-ke deıin kóbeıedi, oryndardyń 80,3%-y ottegimen qamtylyp, 21 stasıonarlyq rentgen apparaty ornatyldy, ókpeni jeldetetin 382 apparat, 450 ottegi konsentraty, 626 ottegi ballondary, 787 Bobrov apparaty men 424 ottegi jastyǵy bar.
Jedel járdem beketi men emdeý mekemeleriniń avtoparkteri 41 sanıtarlyq mashınamen tolyǵyp, 6 mobıldi dıagnostıkalyq keshen satyp alyndy, dárilik zattar men jeke qorǵanys zattarynyń eki aılyq qory jasaqtaldy. Nurjaýǵan Qalaýov baqylaý toptarynyń jumysyn qatań synǵa aldy.
Onyń sózinshe, 47 baqylaý toby 31 myń nysandy qamtı otyra 9673 tekseris júrgizgen. 1909 adam ákimshilik jaýapqa tartylyp, 184 mln. teńge aıyppul salyndy. Aqpan aıynyń basynan beri Aqtóbe qalasynda anyqtalǵan zań buzýshylyqtar sany birneshe esege azaıǵan, buǵan baqylaýdyń álsizdigi dálel.
Soǵan baılanysty oblys ákimi toptardyń jumystaryn qarqyndatýdy, sonymen qatar, halyq arasynda ekpe jónindegi aqparattandyrý-túsindirý jumystaryn kúsheıtýdi tapsyrdy.
«Sanıtarlyq-epıdemıologııalyq jaǵdaıdy turaqty dep aıtýǵa bolmaıdy, ol kez kelgen sátte nasharlap ketýi múmkin. Baqylaý toptary shekteý sharalaryn buzýshylarǵa qatysty sharalardy qoldana otyra, jaýapkershilikpen jumys isteýleri qajet. Qaýip bar. Budan basqa, máslıhattyń bıýdjetti anyqtaý jónindegi aldaǵy sessııasynda turǵyndardyń Aqtóbe qalasy men aýdan ákimderiniń eseptik kezdesýlerinde aıtqan usynystaryn qaraýymyz kerek»- dep atap ótti Ońdasyn Orazalın.
Sonymen qatar, óńir basshysy «Aqtóbe – adaldyq alańy» jobalyq keńsesiniń jańa basshysy bolyp taǵaıyndalǵan Qýanyshbek Serikjanovty tanystyrdy.
