Reformalar jónindegi Joǵary keńestiń otyrysynda kásipkerlikti qoldaý boıynsha maquldanǵan sharalar týraly ulttyq ekonomıka mınıstri Áset Erǵalıev, jeńildikti nesıe berý baǵdarlamalarynyń monıtorıng nátıjeleri jáne memlekettik qoldaý sharalarynyń tıimdiligin baǵalaý týraly Premer-Mınıstrdiń orynbasary Roman Sklıar, memlekettik qoldaý sharalaryn ázirleý, memlekettik satyp alýdaǵy jergilikti qamtý, «Samuryq-Qazyna» UÁQ» AQ jáne jer qoınaýyn paıdalanýshylardyń satyp alýy boıynsha bızneske júrgizilgen saýalnamanyń aralyq qorytyndylary, mıkroqarjy uıymdarynyń, áleýmettik-kásipkerlik korporasııalarynyń máseleleri jáne óńirlerdegi ShOB-tyń damý áleýeti týraly «Atameken» UKP basqarma tóraǵasy Abylaı Myrzahmetov baıandady.
Otyrysqa Úkimet músheleri, Prezıdent Ákimshiliginiń, jergilikti atqarýshy organdardyń, «Samuryq-Qazyna» UÁQ» AQ, damý ınstıtýttarynyń, Qazaqstan qarjygerler qaýymdastyǵynyń, óńirlik kásipkerler palatasynyń jáne t. b.ókilderi qatysty.
Bıyl 29 qańtarda ótken Reformalar jónindegi Joǵary keńestiń otyrysynda bıznesti damytýdy odan ári yntalandyrý boıynsha kelesi sharalar qaraldy:
- biryńǵaı tólemmen beseýiniń ornyna biryńǵaı mólsherlemeni belgileı otyryp, eńbekaqy tóleý qoryna júktemeni tómendetý;
- jańa óndiristik kompanııalar úshin 2 jyl ishinde QQS-ty azaıtý;
- qaıta ınvestısııalaýǵa baǵyttalǵan tabystyń bir bóligin korporatıvtik tabys salyǵynan bosatý;
- Úkimet ınvestısııalar týraly kelisimder jasasatyn basym qyzmet túrleriniń tizbesin keńeıtý (óńdeý ónerkásibi, AО́K, mashına jasaý, azyq-túlik jáne daıyn ónim óndiretin, tereń óńdeý boıynsha basqa da salalar);
- jeke kásipkerler úshin salyq mindettemelerin tirkeýdi jáne oryndaýdy jeńildetý;
- saýda, aýyl sharýashylyǵy, kólik, turý jáne tamaqtaný boıynsha qyzmet kórsetý salalaryndaǵy bızneske qoıylatyn barlyq talaptardy úshten bir bóligine qysqartý;
- «Bıznestiń jol kartasy-2025» sýbsıdııalaý baǵdarlamasyna mıkroqarjy uıymdaryn qosý;
- qoǵamdyq tamaqtaný salasy úshin 6% mólsherleme boıynsha bólshek salyq rejımin engizý.
Atalǵan sharalardy bıyl engizý josparlanyp otyr, bul 2025 jylǵa qaraı 500 myń adamdy jaldamaly qyzmetkerlerdi resmı jumyspen qamtýǵa tartýdy, jyl saıyn óńdeýshi ónerkásipte 15 p.t. ınvestısııalardy ulǵaıtýdy, kóleńkeli ekonomıkany IJО́ 15% deıin tómendetýdi, sondaı-aq mıkro jáne shaǵyn bıznes sýbektileriniń 75%-y úshin eńbekaqy tóleý qoryna júktemeni azaıtýdy qamtamasyz etýge múmkindik beredi.
Bıyl «Qarapaıym zattar ekonomıkasy», «BJK-2025», «Eńbek», «Jumyspen qamtýdyń jol kartasy» baǵdarlamalary jáne Ulttyq banktiń aınalym qarajatyn tolyqtyrýǵa nesıe berý baǵdarlamasy aıasynda bıznesti qoldaýǵa 703 mlrd teńgeden astam qarajat qarastyrylǵan. BJK-2025 baǵdarlamasyn júzege asyrýdyń oń qarqyny baıqalýda. Osy jyldyń qańtar aıynda 60 mlrd teńge somasyna 333 joba nesıelendirilip, 326 joba kepildendirildi. «Qarapaıym zattar ekonomıkasy» jeńildikpen nesıelendirý baǵdarlamasy boıynsha búginde 707,8 mlrd teńge somasyna 2801 joba maquldandy, 527,7 mlrd teńge somasyna 2243 joba sýbsıdııalandy.
«Shaǵyn jáne orta bıznesti ekonomıkalyq shynaıylyqtyń jańa jaǵdaıynda qoldaý – Úkimet jumysynyń basymdyqtarynyń biri. Kásipkerlerdi memlekettik qoldaýmen qamtýdy barynsha keńeıtý qajet. Bul ekonomıkanyń damýyna qosymsha serpin beredi. Ákimdikter bólinetin qarajattyń joǵary tıimdiligin qamtamasyz etýi tıis», — dedi A. Mamın.
Úkimet basshysy «Atameken» UKP-nyń 13 myńnan astam kásipkerge júrgizgen saýalnamasynyń qorytyndylaryn egjeı-tegjeıli zerdelep, bir apta ishinde bıznesti odan ári qoldaý jónindegi qosymsha sharalardy daıyndaýdy tapsyrdy.
Sondaı-aq, Premer-Mınıstr retteletin satyp alýlardaǵy jergilikti qamtýdy baqylaýdy, óńirlerdiń ekonomıkalyq kartasyn ýaqytyly jáne sapaly toltyrýdy qamtamasyz etýdi, otandyq kásiporyndardyń óndiristik qýattaryn júkteý maqsatynda óńirlerdegi kásiporyndardy pasporttaýdy júrgizýdi jáne mıkroqarjy uıymdaryn qurýdy jedeldetýdi tapsyrdy.
