Máselen, Jambyl oblystyq Polısııa departamentinde erekshe tapsyrmalar jónindegi aǵa ınspektor bolyp isteıtin Dılıafrýz Kenjehanova óziniń bes balasynyń ústine ata-ana qamqorlyǵynsyz qalǵan tórt balany qosyp asyrap alǵan eken. Árıne, búginde ózgeniń balasyn baýyryna baspaq túgil, óz balasynan bezip jatqandar da jeterlik. Biraq Dılıafrýz sııaqty qaıyrymdy jandar az da bolsa jetimderdiń kóz jasynyń qurǵap, kóńiliniń ósýine sebepker bolyp júr.
«2019 jyly Taraz qalasyndaǵy №55 mektepte bilim salasyna jaýapty mamandarmen birge «Mektepke jol» aksııasyn ótkizdik. Komıssııanyń quramynda men de bar edim. Mektepke baratyn qujattary joq balalar men azamattyq almaǵan ata-analardy sol aksııa kezinde kóptep jolyqtyrdyq. Aksııa barysynda bir qarııa úsh ret kelip kómek surady. Ol kisiniń birneshe ret kelgenin baıqap, qandaı máseleni sheshe almaı júrgenin ózinen surap bildim. Sóıtsek, úıinde kámeletke tolmaǵan tórt bala bar eken. Shesheleri tórt balany birdeı qarııaǵa tastap, ózi iz-túzsiz ketken. Oǵan izdeý jarııalanǵanymen, nátıje bolmady. Balalar mektepke baratyn jasqa kelgenimen, qujattary joq eken. Biz qarııanyń kóńilin jaılandyryp, úıine qaıtardyq», deıdi Dılıafrýz Kenjehanova. Sodan keshke qaraı bir top komıssııa múshesi beıtanys qarııa berip ketken mekenjaıǵa barady. Balalardyń nashar jaǵdaıyn kóredi. «Qasymyzda qamqorshylar keńesiniń ókili júrgen. Ol dereý jetkinshekterdi Balalar úıine jóneltý kerek degen sheshim shyǵaryp, tıisti akt jasady. Muny estigen álgi qarııa jylap jiberdi. «Kómektesem degen ýádelerińiz qaıda? Balalar úıine tapsyrýdy men bilmeı otyr deısizder me?», dep renjidi. Zańǵa sáıkes balalardyń eshbir týysqany bolmaǵandyqtan, olar memlekettik mekemege berilýi kerek bolatyn nemese asyrap alatyn qamqorshy tabý kerek edi», deıdi ol. Aqyry Dılıafrýz Kenjehanova álgi balalardy patronattyq tárbıege alýǵa sheshim qabyldaıdy.
«Áli kúnge deıin olardyń anasyn izdep jatyrmyz. Ony tabý úshin qoldan kelgenniń bárin jasaımyn. Bir jaǵynan bes balanyń anasy retinde beıkúná sábılerdiń taǵdyryna beıjaı qaraı almadym. Al ekinshi jaǵynan, bul meniń jumysymmen tyǵyz baılanysty sharýa edi. Sondyqtan da otbasymnyń kelisimin alǵan soń, balalar men qarııany óz úıimizge kóshirip aldyq. Meniń de Dıana degen qyzym bar. Sondyqtan bolar, qyzymmen attas bes jasar baldyrǵandy taǵdyrdyń qatal synyna qarııamen birge qaldyrýǵa arym jibermedi. Bıyl birge turyp jatqanymyzǵa úsh jyl bolady. Jıyrma jyldan beri ishki ister salasynda qyzmet atqaryp kelemin. Jumysym aýyr bolsa da, balalardy qamqorlyqtan kende qaldyrǵan joqpyn dep oılaımyn», deıdi ol.
Dılıafrýz Kenjehanova áýeli áriptesterine bul áreketi týraly eshteńe aıtpapty. Biraq keıinnen osy bir saýapty is týraly bilgen áriptesteri shamalarynyń kelgeninshe kómek berip, qoldaý kórsetipti. Tipti demeýshiler de tabylyp, qashyqtan oqytý kezinde balalarǵa kompıýter men prınter syılapty. Bul kúnde toǵyz bala bir shańyraqtyń astynda tatý-tátti ómir súrip jatyr. «Balanyń bárin perzentim dep qabyldaıtyn adamdar kóp bolsa, elimizde jetimder úıi de qalmaıtyn edi», deıdi kópbalaly ana. Shynynda da, qoǵamda Dılıafrýz sııaqty júregi meıirimge toly jandar kóp bolsa, eshqandaı bala tiri jetimdiktiń taqsiretin tartpas edi...
Jambyl oblysy
