Aıta ketý kerek, qala turǵyndary men qonaqtary úshin erekshe týrıstik nysannyń biri – Saıram turǵyn alabyndaǵy «Búrkit» áskerı-sporttyq bazasy. Týrıstik aımaqta Shymkent qalasynyń parashıýtty sport federasııasynyń bazasy jumys isteıdi. Taıaýda BAQ ókilderi, týrıstik uıym ókilderi jáne jastardyń qatysýymen sporttyq bazada «Media Camp» sharasy uıymdastyrylǵan bolatyn. Oǵan qalalyq týrızm jáne syrtqy baılanys basqarmasy, Tourizme centre jáne «Online gid» kompanııalary atsalysqan edi.
Búginde «Búrkit» áskerı-sporttyq bazasyna kelýshiler sany artqan. Bul rette ekstremaldy sporttyń jankúıeri Jansaıa Sársenbek óziniń áserimen bólisti.
- Jýyq arada áleýmettik jeliler arqyly qalamyzda osyndaı sporttyq bazanyń bar ekenin bildim. Lezde sala ókilderimen baılanysqa shyǵyp, aldyn-ala daıyndyq tizimine jazyldym. Munda parashıýtpen sekirý baǵasy – 21 myń teńge. Adamnyń salmaǵyna qaraı, quny da arta beredi. Mysaly, 90 keliden joǵary bolsa, qyzmeti de qymbattaı túsedi. Nusqaýshylardyń 5 saǵattyq ázirliginen soń 1000 metr bıiktikten sekirdim. Bul áser meniń jadymda uzaq saqtalary anyq, - deıdi Jansaıa Sársenbek.
Sala ókilderiniń aıtýynsha, demalys aımaǵynda kelýshiler tek parashıýtpen sekirip ǵana qoımaıdy, sondaı-aq áýe keńistiginde týǵan kún keshterin tabıǵaty kóz tartar orynda ótkizýge bolady.
