Otyrysta elimizdegi munaı-gaz salasynyń ınvestısııalyq tartymdylyǵyn arttyrý men odan ári damytý sharalary jan-jaqty qaraldy.
Jıynǵa Premer-Mınıstrdiń orynbasary Roman Sklıar, Eni S.p.A., Royal Dutch Shell, INPEX Corporation, Chevron, Exxon Mobil, CNPC, Total E&P sııaqty iri munaı-gaz kompanııalarynyń basshylary qatysyp, sóz sóıledi. Eni S.p.A. kompanııasynyń Ortalyq Azııa aımaǵy boıynsha basshysy Lýchano Vaskes kezdesýdi moderator retinde júrgizip otyrdy.
Prezıdent otyrystyń ashylýynda munaı-gaz sektory elimizdiń jalpyulttyq damýynda árqashan mańyzdy ról atqarǵanyn, tehnologııalyq ózgeristerge qaramastan, bul sala el ekonomıkasynyń qozǵaýshy kúshi bolyp qala beretinin atap ótti. Qasym-Jomart Toqaevtyń aıtýynsha, Qazaqstan munaıǵa baı memleket retinde bar áleýetin meıilinshe tıimdi paıdalanýǵa mindetti.
Memleket basshysy Keńes pen Úkimet músheleriniń aldyna birqatar mindetter qoıdy.
Prezıdent eldiń ekonomıkalyq ósimin qamtamasyz etý úshin Teńiz, Qashaǵan jáne Qarashyǵanaq ken oryndaryn keńeıtý boıynsha jobalardy der kezinde júzege asyrýdyń mańyzdylyǵyn atap ótti. Osyǵan baılanysty Teńiz ken ornyn keńeıtý jónindegi jobanyń qurylys jumystary 20 paıyzǵa keshigip jatqanyna alańdaýshylyq bildirip, Úkimetke joba operatorymen birlese otyryp, jumystardy aıaqtaý merzimin keshiktirmeýdi tapsyrdy.
Sonymen qatar Qasym-Jomart Toqaev Qashaǵan ken ornyn ıgerýdiń keleshegi týraly aıtty. Prezıdent munaı óndirýdi táýligine 1,1 mıllıon barrelge deıin ulǵaıtý boıynsha jumystyń úshinshi kezeńin júzege asyrýdyń naqty josparyn jasaý qajet ekenine toqtaldy.
Memleket basshysy ınvestısııa salýdyń jańa tetikterin ázirleýdi, atap aıtqanda, jetildirilgen modeldik kelisimshart týraly aıtty. Bul qujat ınvestısııalyq preferensııalarǵa kepildik bere otyryp, olardyń quqyqtyq jaǵynan qorǵalýy men turaqtylyǵyn qamtamasyz etedi. Osyǵan baılanysty Úkimetke fıskaldyq basymdyqtar paketin anyqtaýdy jedeldetýdi jáne jyldyń sońyna deıin zańnamalyq normalardyń qabyldanýyn qamtamasyz etýdi tapsyrdy.
Sonymen qatar Prezıdent Keńes múshelerin ınvestorlarǵa jer qoınaýyn geologııalyq zertteýden barlaý jáne óndirý jumystaryna kóshýge kepildik beretin Kelisimniń ázirlenip jatqanynan habardar etti.
Qasym-Jomart Toqaevtyń aıtýynsha, jahandyq ınvestısııalarǵa talas kezinde ınvestısııalyq sheshimderdi jedel qabyldaýdyń strategııalyq mańyzy artady. Osyǵan baılanysty ol memlekettik organdarǵa ınvestorlardyń ótinishteri men suraqtaryna qolaıly ári jedel jaýap berý qajet eken atap kórsetti.
Memleket basshysy «bir tereze» qaǵıdaty boıynsha qyzmet kórsetetin Vedomstvoaralyq front-ofıs qurý týraly kelisim jasalǵanyn málimdedi. Prezıdent bul front-ofıske salalyq mınıstrlikter basshylarynyń orynbasarlary kiretinin jáne ony energetıka mınıstri basqaratynyn aıtty.
Sondaı-aq Qasym-Jomart Toqaev qoldanystaǵy munaı-gaz ken oryndarynda gaz óńdeý qýatyn arttyrýdyń mańyzdy ekenin atap ótti.
– Bul turǵyda Qashaǵandaǵy gaz óńdeý zaýyty qurylysynyń der kezinde bastalǵany mańyzdy oqıǵa boldy. Úkimet «Samuryq-Qazyna» Ulttyq ál-aýqat qorymen birlesip, jańa gaz óndirý jobalary úshin jer qoınaýyn paıdalanýshylardan gaz satyp alatyn baǵanyń yntalandyrý formýlasyn jasady. Sondyqtan sizderdi taýarlyq gaz óndirisin ulǵaıtý boıynsha jobalardy iske asyrýǵa atsalysýǵa shaqyramyn, – dedi Prezıdent.
Memleket basshysy kómirsýtegi shıkizattaryn tereń óńdeýdi damytýdy mańyzdy mindet retinde atady. Prezıdent gaz-hımııa jobalaryna kógildir otyn qoldaný ónerkásiptiń shıkizattyq baǵytyn tómendetedi dep paıymdaıdy.
Qasym-Jomart Toqaev munaı-gaz jobalarynda qazaqstandyq úleske basymdyq berý qajet ekenine nazar aýdardy.
Memleket basshysy qazaqstandyq jáne sheteldik kompanııalar arasyndaǵy tehnologııalyq kooperasııalardy nyǵaıtý aıasynda Chevron, Total, Eni, ExxonMobil, Agip sııaqty iri kásiporyndardyń qoldaýymen qurylǵan Munaı-gaz mashınalaryn jasaýdy damytý halyqaralyq ortalyǵynyń qyzmetin atap ótti. Úkimetke halyqaralyq ozyq tájirıbege súıene otyryp, tıimdi tehnologııalar transferti júıesin qurý tapsyryldy.
Qasym-Jomart Toqaev kezdesý sońynda qatysýshylardyń usynystaryna toqtalyp, Úkimetke jyldyń sońyna deıin zańnamalyq normalardyń qabyldanýyn qamtamasyz etýdi, kóterilgen barlyq másele boıynsha atqarylǵan jumystar týraly tolyq esep berýdi tapsyrdy.
Sonymen qatar Memleket basshysy daýly máselelerdi sheshý úshin sheteldik platformalarmen qatar Astana halyqaralyq qarjy ortalyǵynyń arbıtrajdy sotyn da paıdalanýǵa bolatynyn aıtty. Sondaı-aq birlesip jumys isteýdi jalǵastyra berýge jáne elimizdegi ınvestısııalyq ahýaldy jaqsartýǵa múddeli ekenin jetkizdi.
