«Bastaýda» qandaı kartınalardyń baǵy jandy?

«Bastau Debuts» baıqaý baǵdarlamasynda Amın Naıfeniń «200 metr» atty kartınasy basty júldege laıyq dep tanyldy. «Úzdik fılm»  atalǵan kartına birneshe eldiń (Palestına, Iordanııa, Katar, Italııa jáne Shvesııa) qatysýymen túsirilgen jáne Taıaý Shyǵystaǵy otbasynyń oqıǵasyn baıandaıdy. Mustafa men onyń áıeli Salva eki aýylda turady. Eldi mekender 200 metr qashyqtyqta ornalasqanyna qaramastan, qabyrǵamen bólingen. Birde telefon qońyraýy estiledi, endi otbasy úshin bárine daıyn ákesi qabyrǵanyń arǵy betine ótýi kerek. Ol úshin 200 metr 200 shaqyrym qashyqtyqqa aınalady.

Iýrıı Bykov bastaǵan halyqaralyq qazylar alqasy bul fılmge «Úzdik rejıssýra» syılyǵyn da berdi. Sonymen birge konkýrstyq baǵdarlamada «Úzdik akter» syılyǵyn «Belyı kıt» fılmindegi Daınıýs Gavenonıs (Reseı), «Úzdik aktrısa» marapatyn «Kto spıt v serebrısto-serom» fılminde oınaǵan aktrısa Inın Ma (Qytaı) jeńip aldy. «Qazylar alqasynyń arnaıy júldesi» qazaqstandyq Álisher Jádigerovtyń «Otaý» kartınasyna buıyrdy.

«Kez kelgen festıval lotereıa sııaqty. Sondyqtan búgin júldeden tys qalǵan azamattarǵa óz qabiletterińizge, kıno túsirýge degen talpynystaryńyzǵa eshqashan kúmándanbańyzdar degim keledi. Eń bastysy kıno syılyq úshin túsirilmeıdi. Osyny árdaıym este saqtańyzdar», dedi qazylar alqasynyń tóraǵasy Iýrıı Bykov jabylý saltanatynda sóılegen sózinde.

Festıvaldiń eń úzdik qysqametrajdy fılmine tıesili syılyq Tájikstannan kelgen rejısser Manzaralı Sheralıdiń «Obýza» kartınasy berildi. Reseılik Tatıana Fedorovskaıanyń tóraǵalyǵymen ótken Bastau Shorts baǵdarlamasynda qazylar alqasy kelesi nomınasııalar boıynsha jeńimpazdardy anyqtady.

 «Úzdik qysqa metrajdy anımasııalyq fılm» - Shokır Holıkovtyń (О́zbekstan) «Qyz ben bult» fılmi;

«Qazylar alqasynyń arnaıy júldesi» - qazaqstandyq rejısser Nurbol Erbolulynyń  «Túıme» kartınasy;

«Erekshe atap ótý» nomınasııasy - reseılik Andreı Natosınnyń «Katıa» fılmi;

«Erekshe atap ótý» nomınasııasy - Belarýs rejısseri Iýrıı Semashkonyń «Kogda ıa byl general» kartınasy.

 Derekti fılmder seksııasynda «Úzdik tolyqmetrajdy derekti fılm» nomınasııasy boıynsha Ýkraınadan kelgen Andreı Lıseskııdiń «Ivan jeri» atty jumysy jeńiske jetti. Ýkraınalyq Marııa Shevchenkonyń «Rodımoe pıatno» kartınasy «Úzdik qysqa metrajdy derekti fılm» nomınasııasyn utyp aldy. Al qazylar alqasynyń arnaıy júldesi qazaqstandyq rejısser Tilek Yrysbektiń «Jumagúldiń álemi» kartınasyna buıyrdy.

Halyqaralyq stýdenttik qazylar alqasy ózbekstandyq rejısser Sherzod Nazarovtyń «Jibek jolynda» kartınasyna festıvaldiń «Úzdik qysqametrajdy fılmi» marapatyn tapsyrdy. Sondaı-aq, stýdenttik qazylar alqasynyń arnaıy syılyǵyn rejısser Elza Gaýdjdiń (Latvııa) «Lokdaýn» fılmi jeńip aldy. Al qazaqstandyq rejısserler Dilshat Rahmatýllınniń «Besik jyry» jáne Aıdana Baýyrjanqyzynyń «Áke, án aıtyp bereıik pe?» jumystary qazylar alqasy tarapynan erekshe atalyp ótildi.

Bıyl kınofestıval qatysýshylary men qonaqtary bes kún ishinde álemniń otyzdan astam eliniń rejısserleri túsirgen 80 fılmdi tamashalady.

Dástúrli túrde ótetin kıno merekesin QR Mádenıet jáne sport mınıstrliginiń, Almaty qalasy ákimdiginiń, T.Júrgenov atyndaǵy Qazaq ulttyq óner akademııasynyń, Turan Ýnıversıtetiniń, Ál-Farabı atyndaǵy Qazaq Ulttyq Ýnıverstıtetiniń, Ulttyq kınony qoldaý memlekettik ortalyǵynyń jáne Sh.Aımanov atyndaǵy «Qazaqfılm» kınostýdııasynyń qoldaýymen «Tanaris Production» jáne A Team kınokompanııalary uıymdastyrdy.