Kásipkerlerdiń quqyn qorǵaýda ońdy ister bar

Parlament Májilisiniń depýtaty Qýanysh Sultanovtyń tóraǵalyǵymen Bas prokýratýranyń Zańdylyqty qamtamasyz etý máseleleri jónindegi qoǵamdyq keńesiniń kezekti otyrysy bolyp ótti, onda kásipkerlerdiń quqyqtaryn qorǵaý máseleleri talqylandy. Jınalys jumysyna Ulttyq kásipkerler palatasy jáne О́ńirlik damý mınıstrliginiń ókilderi qatysty. Keńes tóraǵasy Q.Sultanov atap ótkendeı, ákim­shilik kedergilerdi azaıtý jáne bıznesti zańsyz aralasýdan qorǵaýdyń kepildigin qamtamasyz etý boıynsha maqsatqa baǵyttalǵan sharalar qabyldanýda. Memleket basshysy «Qazaqstan joly – 2050: bir maqsat, bir múdde, bir bolashaq» taqyrybyndaǵy óz Joldaýynda bıznesti damytýǵa barynsha qolaıly jaǵdaı jasaýǵa taǵy da nazar aýdardy. Kásipkerlik qyzmet úshin jaǵdaıdy túbegeıli jaqsartý degenimiz, memleket pen bıznestiń seriktestik qarym-qatynasyn, qolaıly bıznes-klımatty qalyptastyrý, anyqtaý jáne jazalaý saıasatynan adal nıetti kásipkerlerdi eskertý jáne kótermeleýge ótý boıynsha reformalar jasaýdy bildiredi. Memleket basshysynyń «Qazaqstan Respýblıkasynda kásipkerlik qyzmet úshin jaǵdaıdy jaqsartý jónindegi túbegeıli sharalar týraly» Jarlyǵyn jú­zege asyrý máseleleri prokýra­týra organdarynyń erekshe baqy­laýynda tur, ol boıynsha aǵymdaǵy jyldyń sáýirinen bas­tap shaǵyn jáne orta kásipkerlik sýbektilerin tekserý toqtatyldy. Tekserister toqtatylǵan ýaqyttan beri memlekettik organdar bastamashy bolǵan 3 tekseris tirkelgen, al osyǵan deıin jyl boıyna orta eseppen 200 myń shamasynda tekseris júrgizilip kelgen. Pro­ký­ratýra organdary tekseris taǵaı­yn­daý týraly 10 aktini tekserý­den bas tartty. Moratorıı talap­taryn buzǵandary úshin 11 laýazym­dy tulǵa jaýapkershilikke tartyldy. Moratorıı engizýden kútiletin basty nátıje bıznesti damytýǵa yńǵaıly jaǵdaı jasaý jáne ákim­shilik aýyrtpalyqty azaıtý bolyp tabylady. Sonymen qatar, jı­nalysta atalyp ótilgendeı, mem­lekettiń bastamasyn kásip­ker­lerdiń durys túsinýi jáne zańdy­lyq­ty múltiksiz saqtaýdyń da mańyzdylyǵy erekshe. «Egemen-aqparat».