Qoǵam • 02 Jeltoqsan, 2022

Shekarany búkil el qorǵaıdy

Hantáńiriniń etegi, Raıymbek batyrdyń mekeninde qońyr tirshilik keship jatqan halyqtyń shekarashylarǵa degen kóńilderi alabóten. Osy óńirden qurylǵan erikti jasaqshylar toby bar. Bul óz aldyna, Súmbe aýylynyń úlkeni men kishisine deıin qyraǵy. Mal qaıyryp júrip, shekaraǵa jaqyn mańnan bóten adamdy baıqap qalsa, dereý shekarashylarǵa habarlaıdy. Muny shekarany shekarashylar ǵana emes, búkil el qorǵaıdy dep bilgendikten jasaıdy.

Egemen Qazaqstan

Súmbe aýylynyń Abaı atyndaǵy orta mektebinde qyraǵy turǵyndardy ulyqtaýǵa arnalǵan saltanatty rásim ótti. Is-sharaǵa Raıymbek aýdandyq máslıhatynyń depýtaty E.Jumahanov, Súmbe aýyldyq okrýginiń ákimi E.Bestibaev bastaǵan aýyl turǵyndary men mektep oqýshylary, sondaı-aq Shekara qyzmetiniń ardageri otstavkidegi polkovnık Qazaqbaı Ertishpaev qatysty. El shebinde izi saırap jatqan sańlaq sardardyń shekara túbindegi aýylǵa alystan at aryltyp jetýiniń ózindik sebebi bar. Qazaqbaı aǵa sonaý 70-shi jyldary óziniń el shebindegi alǵashqy qyzmetin osy aýyldyń shetindegi shekara zastavasynda bastaǵan.

«Otan shekaradan – demek dál osy aýyldan, sizderden bastalady», dedi podpolkovnık Q.Ádilov. Ol memlekettik shekarany qorǵaý isine belsene atsalysyp júrgen azamattarǵa alǵysyn aıtyp, jyl basynan beri ustalǵandardyń ishinen 20-dan astam shekara buzýshynyń jergilikti turǵyndardyń arqasynda qolǵa túskenine toqtalyp ótti.

Budan keıin sóz tizginin alǵan UQK Shekara qyzmetiniń «Qurmetti ardager» tósbelgisiniń ıegeri otstavkidegi polkovnık Q.Ertishpaev «Shekarany búkil halyq qorǵaıdy» uranynyń ásirese shekara aımaǵy úshin mańyzy zor ekenin aıta kelip, el shebindegi óz basynan ótkizgen qyzyqty oqıǵalarymen bólisti.

«Biz de jas, biz de óz eliniń patrıoty boldyq. Boıymyzdaǵy osy rýh bizge kúsh berip, kúni-túni shekaradan shyqqan joqpyz. Halyqpen tyǵyz aralasyp, shekarany birge qorǵadyq. Osynda otyrǵan erikti jasaqshylar ol kezde ózderińdeı mektep balalary bolatyn. Shekarashylarǵa qarap boı túzegen balalar da az bolǵan joq. Mektep bitirgen sol balalardyń ishinen shekarashylardyń oqýyna túsip, ofıser atanǵandar da boldy. Senderden de sondaı patrıottyq rýhty, Otandaryńa degen súıispenshilikti kútemin», dedi Q.Ertishpaev.

Is-shara barysynda jergilikti turǵyndardyń ishinen shekarany kúzetý isine belsene atsalysqan aýyl azamattary UQK Shekara qyzmeti Almaty oblysy boıynsha departamenti Raıymbek aýdany boıynsha shekara basqarmasy bastyǵynyń maqtaý gramotasymen marapattaldy. Sondaı-aq shekara qyzmetkerlerine «Shekara qyzmetine – 30 jyl» merekelik medali de tabystaldy.

Tamara DÁÝLETBAEVA,

UQK Shekara qyzmetiniń zapastaǵy podpolkovnıgi.