Keleli másele qaraldy

Aqtaý qalasynda munaı-gaz ónerkásibi ulttyq klasteri aktıviniń kongresi ótti. Onda salanyń jáne klasterlik bastama quramynyń damýy týraly is-áreketi talqylandy. Kongresti Mańǵystaý oblysynyń ákimdigi men Qazaqstan Respýblıkasynyń Ulttyq kásipkerler palatasy uıymdastyrdy. Kongress jumysyna Mańǵystaý oblysynyń ákimi Alık Aıdarbaev, Munaı jáne gaz mınıstriniń orynbasary Maǵzum Myrzaǵalıev, «Samuryq-Qazyna» ál-aýqat qory» AQ Munaı-gaz aktıvi dıreksııasynyń basqarýshy dırektory Málik Sálimgereev, «KAZENERGY» «Munaı-gaz jáne energetıkalyq keshen uıymdarynyń qazaqstandyq assosıasııasy» ZTB adamı kapıtalyn damytý jónindegi atqarýshy dırektory Toǵjan Qojalıeva, Ulttyq kásipkerler palatasy basqarma tóraǵasynyń orynbasary Ekaterına Nıkıtınskaıa, «QazMunaıGaz» UK» AQ, «Qazaqstan munaı jáne gaz ınstıtýty» AQ, sondaı-aq, elimizdiń munaı-gaz sektorynyń quramyna kiretin kásiporyndar ókilderi qatysty. Bıylǵy jyldyń mamyr aıynda bolǵan Úkimet otyrysynda Qazaqstan Respýblıkasynyń 2015-2019 jyldarǵa arnalǵan Údemeli ındýstrııalyq-ınnovasııalyq damýynyń memlekettik baǵdarlamasy maquldanǵan bolatyn. Osy baǵdarlama aıasynda Atyraý, Mańǵystaý jáne Batys Qazaqstan oblystary aýmaǵynda munaı-gaz óndirý jáne qaıta óńdeý, munaı-gaz hımııasy, mashına jasaý men munaı-gaz ónerkásibi úshin qyzmet kórsetý boıynsha Ulttyq klasteriniń damýyna memlekettik qoldaý keńinen kórsetilmek. Ekonomıkany qalyptastyrýdaǵy klasterlik tásil aýmaqtar damýynyń básekege qabilettiligin arttyrý úshin eń tıimdi tetik bolyp tabylady. Al ulttyq klaster keńesine Munaı jáne gaz mınıstrligi, Ulttyq kásipkerler palatasy jáne «Samuryq-Qazyna» ál-aýqat qory» AQ kiredi. Klaster ıntegratorynyń mindetin «Qaz­MunaıGaz» UK» AQ qamtamasyz etip, «Báı­terek» ulttyq basqarýshy holdıngi» AQ qarjy­lyq agenti qyzmetin atqarady. Kongresti ótkizýdegi maqsat – san salaly ónerkásiptiń múddeli qatysýshylarymen ult­tyq klaster jumysynyń negizgi aspektilerin anyqtaý úshin únqatysý alańyn qurý bolatyn. Talqylanǵan basymdy máseleler qatarynda qazaqstandyq mazmun men qyzmettiń, satyp alý boıynsha servıstik kompanııalardyń, iri jobalardyń operatorlary (Kaspııdegi Teńiz, Qarashyǵanaq, Qashaǵan jáne t.b offshorlyq jobalar) úlesin, munaı servıstik kompanııalar (kásiptik-tehnıkalyq bilim berý, kásiporyndardy jáne onyń qyzmetkerlerin sertıfıkattaý, onyń ishinde halyqaralyq sertıfıkattaý) deńgeıin, tehnıkalyq retteý, metrologııa jáne menedjment júıesi salasyndaǵy qyzmetkerlerdiń biliktiligin arttyrý, sondaı-aq, munaı óńdeý jáne munaı óndirý qubyrlar ónerkásibi úshin mashına men jabdyqtar shyǵarý salasyndaǵy jobalardyń júzege asyrylýy tárizdi máseleler oryn aldy. Qatysýshylar on-line rejimindegi pikirtalas kezinde kóterilgen máselelerge qatysty syndarly usynystary men eskertpelerin bildirip, pikirlerin de ortaǵa saldy. Kongreste jumys qorytyndysy boıynsha qarar qabyldandy. Qatysýshylar kókeıkesti máselelerdiń oryndalýyn únemi nazarda ustaýǵa usynys jasady. Sonyń negizinde birqatar qujattar ázirlenip, kezeń-kezeńimen júzege asyrylýy júkteldi. Marat AQQUL, «Egemen Qazaqstan».