Qaıǵyly jaǵdaı 2022 jyldyń 13 maýsymynda boldy. S.Amanjolov atyndaǵy ýnıversıtettiń 3-kýrs stýdenti Meıir Serikuly bir kún buryn tanysqan qyzdyń ótinishimen úsh qurbyny О́skemennen 50-60 shaqyrym jerdegi Sibe kóline aparǵan. Saǵat úshter shamasynda úsh qyz kóldiń tereń jerine ketip qalsa kerek, tunshyǵa bastaıdy. Dál sol sátti jaǵadan beınetaspaǵa túsirip jatqan Meıir qalta telefonyn tastaı sala kómekke umtylǵan. О́kinishtisi, úsh qyzdy qutqarǵanymen, ózi sol jerde ómirmen qosh aıtysady. Beınejazba demekshi, Meıirdiń telefon kamerasyna oqıǵanyń shet jaǵasy túsip te qalǵan.
– Árkim óz balasyn maqtaıdy ǵoı. Dese de, meniń tuńǵyshym 21 jasqa deıin birde-bir ret jamandyǵyn kórsetpedi. Úı sharýasynyń bárin ózi retteıtin. Amal ne? Qanatym qyrqylǵandaı kúıge tústim. О́zimiz Marqakóldiń týmasy bolǵanymyzben, Ulan aýdanynda turamyz. Ulym bıyl oqýyn támamdap, ekonomıst mamandyǵyn alyp jatar edi... Bul týraly úndemeı-aq ta qoıar edik. Úsh qyzdyń ata-anasy kelip, rahmet aıtpaı-aq qoısyn, jubatyp, kóńil de aıtpady. Jaraıdy, árkimniń óz óresi bar. Keıin qujattaryn jınap alaıyn dep oqý ornyna barǵanymda «bereshek kitaptary bar ma, oqýynyń aqshasy tólendi me?» degendeı suraqtar qoıdy. Olar úshin durys ta shyǵar. Biraq ulymnyń úsh qyzdy qutqaryp, jazym bolǵanyn ýnıversıteti bilip otyr. Kerisinshe, aldymnan shyǵyp, is-qaǵazdardy rettep berse, meniń tóbem kókke jeter edi ǵoı. Onyń qasynda kúshikti qutqaryp qalǵandardy da marapattap jatady, – dep ákesi Serik Nábikenov bolǵan oqıǵany tarqatyp aıtyp berdi.
Ras, keıde qoldan batyr jasap, bolmashy is tyndyrǵandardy kókke kóterip jatamyz. Onyń qasynda Meıir bir-bir úıdiń álpeshtep otyrǵan úsh qyzyn ólim aýzynan aman alyp qalýy kózsiz erlik der edik.
– Dál sol kúni erte shyqtym úıden. Ádette ulymdy oıatyp, tapsyrma beretinmin. Bul joly uıqysyn qımadym. Aldyndaǵy kúni ǵana biraz sharýa tyndyrǵan edi. Oqıǵa qalaı boldy, tolyq bilmedim. Áıteýir ózimdi qoıarǵa jer tappaı qobaljyp júrdim. Ulymdy únemi qadaǵalap otyratynmyn. Sol kúni de qońyraý shaldym, tutqany kótermedi. Oqýynda dep oıladyq. Ári-beri júgirip júrip, ózim de telefonymdy umytyp ketippin. Keshki bester shamasynda telefonymdy taýyp qarasam, bóten nómirden alty qońyraý túsipti. Qaıta habarlassam, polısııadan eken. Sol jerde estirtti, eseńgiretti... Alyp-ushyp, kólge jettim. Endi oılaımyn ǵoı, qyzdar ýaqytyly kómekke shaqyrsa, shyǵaryp ta alar ma edi? Sebebi balyqshylar kelip, sýdan shyǵarǵanda júrek soǵysy bolǵan eken. Jedel járdem bir saǵatta jetken. Odan polısııa barǵan. Men barǵanda úsh qyz otyr. Kim ne dedi, esimde joq. Altyn asyqtaı ulym edi. Bir emes, úsh jannyń ómirin qutqardy. Qaryndasy da dál sol kezde UBT tapsyryp jatty. Kóńili alaı-dúleı boldy da qaldy. Kenje ulym Sáken menen góri aǵasyna jýyq edi. Bir eli qasynan qalmaıtyn. Ol da jetimsirep qaldy. Anasynyń qandaı kúıde ekenin aıtpasam da bolady. Saǵynamyz, – deıdi áke júregi qan jylap.
Iá, «jazmyshtan ozmysh joq» deıdi qazaq. Ákesi Serik Nábikenovtiń endigi tilegi, balasynyń erligi baspasóz betinde qalyp, sońynan ergen ini-qaryndasynyń maqtanyshy bolsa deıdi. Oqý orny tarapynan da erligi eskerilip, esimi stýdentter arasynda da aıtylyp júrse artyqtyq etpes edi.
Shyǵys Qazaqstan oblysy,
Ulan aýdany
