Áleýmettik jelidegi eki beınejazbany kórip, eriksiz egildik ári rıza boldyq. Áýelgisinde Semeıdegi Shákárim atyndaǵy ýnıversıtettiń stýdentteri oqý ornynyń kúzetshisin týǵan kúnimen quttyqtap, tosynsyı jasaıdy. Jumys ornynda turǵan egde kisi tańǵalysyn jasyra almaǵan. Stýdentter jappaı jamyrasyp quttyqtaǵannan keıin baryp, es jıyp, qýanyp, tort ústindegi maıshamdaryn úrleıdi. Sosyn kózine jas alady.
Kúzetshiniń aty-jóni Mamyrbek Táshkenbaev eken. Osy oqý orny qaýipsizdigine jaýapty bolyp kele jatqanyna úsh jylǵa jýyqtapty. «Ol kisi óte adal jáne jaýapty. Ujym da, basshylyq ta tek jaqsy qyrynan biledi. Súıikti kúıeý, áke jáne ata», deıdi ýnıversıtet ujymy.
Stýdentter mundaı erekshe syıdy uıymdastyrý úshin ádeıi sabaq bolmaıtyn demalys kúnin tańdap alypty. Bir ǵana aıaýly sát óz qyzmetin únsiz ǵana atqaryp júrgen adamnyń mereıin tasytty, ekrannyń ber jaǵynda qarap otyrǵan qanshama jannyń kóńiline meıirim dánin septi.
Ekinshi keıipker – Tólegen aǵa qanshama jyldan beri Pavlodar qylmystyq atqarý júıesi departamenti mekemesiniń aýlasyn tazalaıdy. Qaq-soqpen isi joq, yjdaǵatty jan eken. Osy mekemede jumys isteıtin quqyq qorǵaý salasynyń ókilderi ol kisimen etene jaqyn bolyp ketken. Aıtýynsha, Tólegen aǵa ondaǵylardyń bárin óziniń júıeli jumysymen, sypaıylyǵymen jáne adamgershiligimen tánti etken. Reseıde týyp, keıin Qazaqstanǵa kóship kelip, uzaq jyl boıy anasymen birge turǵan. Birer jyl buryn anasy dúnıeden ótken. Qazir jalǵyz. Qalaı degende de taǵdyrly adam. Mekeme qyzmetkerleri aǵany týǵan kúnimen quttyqtaý jıynyn uıymdastyryp, keń dálizdi merekelik kóńil kúıge bólep, aınalany áspettep, bezendiredi. Sosyn baryp keıipkerdiń ózin shaqyrady. Departament aýlasynyń tazalyǵymen shapqylap júrgen Tólegen aǵa mynadaı erekshe qurmetke ań-tań. Sener-senbesin bilmeıdi. Biraq aqıqat beıneler ózine qarap jymıysyp, alqalaıdy.
«Bizde qyryqqa jýyq adam eńbek etedi. Aǵanyń anasy dúnıeden ozǵanda ol dám ákelip, as berdi. 8 naýryz merekesinde shokolad syılap, kóńil kúıimizdi kóteredi. Jalǵyz turatynyn bilgen soń biz ol kisige talaı kómektespek boldyq. Alaıda ár kez bas tartty. Sol sebepti týǵan kúnin asyǵa kúttik», deıdi mekeme qyzmetkerleriniń biri.
Kúzetshi, tazalyqshy sııaqty kásip ıeleriniń eleýsiz tirlik keshetini túsinikti. Mindeti bólek bolǵan soń, ujymmen de aralasyp kete bermeıdi kóp jaǵdaıda. Ári kóp rette mundaı jumystardy egde kisiler atqarady. Aılyqtary da, zeınetaqysy da kóp emes. Biraq kóńilderi kól-kósir. Kóbi birtoǵa. Kóńil túkpirindegi kók dónenge otyryp, shapqylaı jóneletinderi tym-tym sırek. Ondaı jandardy bir sát qýantyp, myna alyp qoǵamnyń bir múshesi ekenin sezindirip qoıý, sirá, adamzatqa jasalǵan jaqsylyqtyń úlkeni bolar. Meıirim – energııa. Adamnan adamǵa taralady. Bireýden jan shýaǵyn kórgen, sezingen jan ony mindetti túrde basqamen bólisedi. Qazaq qýanyshty bólisseń kóbeıedi dep tekke aıtpaǵan bolar.
Meıirim uǵymynyń ásilinde aıasy tym keń. Joǵaryda aıtqandaı, bul tek tort syılap, týǵan kúnimen quttyqtaý emes. Balalarǵa qorǵan bolý da – meıirim. Olar oınaıtyn aýlany qaýipsiz etip salý, olar oqıtyn baqsha men mektepti sapaly etip salý – meıirim. Ár adamnyń qaýipsizdigine kepil bolý – meıirim. Eldiń aýzynan jyryp jınalǵan qazyna qarjysyn jymqyrmaý – meıirim. Erteli-kesh áleýmettik tólem tólep, qaptyń túbin qaǵa bermeı, halyqtyń ál-aýqatyn arttyrýǵa kúsh salý – meıirimniń tipti kókesi.
Meıirimdi qoǵamnyń ádil, adal bolatyny, adamı qundylyqtardy alǵa ozdyryp, onyń óz kezeginde materıaldyq qundylyqtarǵa da jol ashatyny beseneden belgili. Biraq biz sońyra aıtyp ótken memlekettik deńgeıdegi meıirimderdiń qoǵamdaǵy shaǵyn qadamdardan quralatynyn umytpaǵan abzal. Jabyrqap júrgen jaqynyńdy jaı ǵana qýanta salýdyń ózi dúnıeniń taǵdyryna áser eter kúshke ıe ekenin biz bile bermeımiz ǵoı. Talaı adam bir kezde kórgen meıiriminiń áserinen jer-dúnıeni qaıran qylarlyq jetistikterge qol sozdy. Endi ol kelesi tolǵamnyń taqyryby bolar...
