Finprom málimeti boıynsha, shyǵyn men tabys arasyndaǵy aıyrmashylyq – 2,4 trln teńge, araqatynasy – 118,5 paıyz. Al byltyr aıyrmashylyq 720,9 mlrd teńge, araqatynasy 106,1 paıyz bolǵan. Sońǵy jyldary shyǵyn tabystan únemi asyp ketip júr.
Bıyl qańtar-qyrkúıektegi respýblıkalyq bıýdjet tabysynyń 69,1 paıyzy salyq túsimderi esebinen qalyptasty. Jalpy, jyl basynan beri qazynaǵa 8,9 trln teńge salyq túsken, bul byltyrǵy qańtar-qyrkúıekpen salystyrǵanda birden 23 paıyzǵa artyq. Eń kóp bóligin qosylǵan qun salyǵy (4,1 trln teńge), korporatıvtik tabys salyǵy (2,4 trln teńge) jáne aksızder (116,6 mlrd teńge) qurady.
Salyqtyq emes túsimder – 245,7 mlrd teńge (bir jylda 1,9 paıyzǵa kóbeıgen), negizgi kapıtaldy satýdan túsken tabys 401,3 mln teńge (69,2 paıyzǵa azaıǵan) bolypty. Al transfertter 3,7 trln teńge, byltyrǵydan 12,4 paıyzǵa az.
Respýblıkalyq bıýdjet shyǵynyna keletin bolsaq, bıyl qańtar-qyrkúıek qorytyndysy boıynsha onyń basym bóligi áleýmettik kómek pen áleýmettik qamsyzdandyrýǵa tıesili boldy: 3,5 trln teńge, bir jylda 8,4 paıyzǵa kóbeıgen. Bul – memlekettik bıýdjettiń barlyq shyǵynynyń 22,8 paıyzy.
Shyǵynnyń taǵy 9,9 paıyzy densaýlyq saqtaý salasyna jumsaldy: 1,5 trln teńge – byltyrǵydan 9,9 paıyzǵa kóp. Odan keıingi orynda 5,1 paıyz úlespen qoǵamdyq tártipti, qaýipsizdikti qamtamasyz etý, quqyqtyq, sot jáne qylmystyq-atqarý qyzmeti salasyna jumsalǵan shyǵyn tur (jyl basynan beri 785,9 mlrd teńge, 21,5 paıyzǵa kóbeıgen).
Qaryzǵa qyzmet kórsetýge bıýdjetten 1,6 trln teńge jumsalǵan. 2022 jyly bul baǵyttaǵy shyǵyn 1,1 trln teńge bolǵan. Jyldyq ósim – 42,5 paıyz.
