Aýdan ákimi baspasóz qyzmetiniń málimetinshe, jańadan ashylǵan eki qabatty sport kesheniniń aýmaǵy 4 595,45 sharshy metr Onda dzıýdo, qazaq kúresi, erkin jáne grek-rım kúres zaldary, boks, shaǵyn fýtbol, voleıbol, basketbol oınaýǵa bolatyn ámbebap jáne basqa da jattyǵý zaldary bar. Zamanaýı qural-jabdyqtarmen jabdyqtalǵan keshende aýyl jasóspirimderi atalǵan sporttyń barlyq túrimen aınalysady.
«Búginde aýdan turǵyndaryna 134 sporttyq nysan qyzmet kórsetip jatyr. Onyń ishinde 2 stadıon, 5 sport kesheni, 53 sport zal, 74 jazǵy deneshynyqtyrýǵa arnalǵan oryn bar. Mine, búgin Dostyq aýylynda 80 oryndy jańa sport kesheni boı kóterip, paıdalanýǵa berildi», dedi aýdan ákimi Almas Abdınov.
Dostyq aýyly aýdan ortalyǵy Úsharal qalasynan 180 shaqyrym qashyqtyqta ornalasqan. Halyq sany 6 735 adamdy quraıdy. Jalpy, alystaǵy aýyldarda sportqa qyzyǵatyn jastar qarasy kóp. Ony Sarqan aýdanyna qarasty Ekiasha aýylynda shańǵy sportynan ótken oblystyq chempıonatta baıqadyq. Adam aǵzasyna paıdaly sport túrleri aýdanda jylda ótkizilip keledi. Qary mol túsetin taýly aımaqtyń qyrat-qyrlary shańǵyshylar múmkindigin jan-jaqty kórsetýine qolaıly.
Rasynda, áıelder jáne erler arasyndaǵy jarys tartysty ótti. Erler 1 500, 3 000 metr qashyqtyqqa synǵa tústi. Olardyń arasynda talaı synǵa túsip, shyńdalǵan, oza shapqan tájirıbeleri mol jas sportshylar men saqa sportshylar da bar. Degenmen jastar qarap qalǵan joq.
Jan alysyp, ashy teri shyqqan eki kúndik jarystyń nátıjesinde jalpy komandalyq birinshi oryndy Kerbulaq aýdanynyń komandasy jeńip aldy. Jeńimpaz komandaǵa deneshynyqtyrý jáne sport basqarmasynyń kýbogi men aqshalaı syılyq tabystaldy. Al ekinshi, úshinshi oryndardy Taldyqorǵan qalasy men Alakól aýdanynyń komandalary bólisip, mereıi ústem boldy.
Joǵaryda aıtylǵan taqyryp sheńberinde oblystyq máslıhattyń densaýlyq saqtaý, bilim berý, halyqty áleýmettik qorǵaý, mádenıet, ishki saıasat jáne sport máseleleri jónindegi turaqty komıssııa otyrysy ótken edi. Sonda oblystyq deneshynyqtyrý jáne sport basqarmasynyń basshysy Ulan Rysqul óńirde sportpen únemi aınalysatyn erekshe qajettilikteri bar jandardyń sany artqanyn aıtty. Máselen, sportpen shuǵyldanýshylar 2022 jyly nebári 8 paıyz bolsa, qazirgi ýaqytta 13 paıyzdan asqan. Sala jetekshisi kún tártibinde kóterilgen máselelerge aıryqsha toqtalyp, jaýap berdi.
«Jalpy, oblys boıynsha múgedekterge arnalǵan sport túrlerimen aınalysatyn adamdardyń sany – 1 386. Oblystyń jumyspen qamtýdy úılestirý jáne áleýmettik baǵdarlamalar basqarmasy I topqa, II topqa jatatyn múgedekterge, bala kezinen múgedektigi bar jandarǵa kómekshiler taǵaıyndady. Múmkindigi shekteýli sportshylardyń kómekshileri jarystarǵa jáne kúndelikti jattyǵý jumystaryna qatysady. 2023 jyldyń qorytyndysy boıynsha Álem, Azııa chempıonattarynda jáne halyqaralyq jarystarda Jetisý óńiriniń parasportshylary 14 altyn, 7 kúmis, 10 qola júlde ıelendi. El chempıonattary men respýblıkalyq jarystarda olar 107 altyn, 80 kúmis, 64 qola medal jeńip aldy. Sonymen qatar Hanchjoý qalasynda (Qytaı) tirek-qımyl apparaty buzylǵan sportshylar arasynda ótken IV Paralımpıadalyq Azııa oıyndarynda oblystyq sportshylar bir kúmis jáne bir qola medalǵa ıe boldy», dedi U.Rysqul.
Aıta keteıik, búginde úzdik nátıje kórsetken 49 sportshy oblys ákiminiń qaýlysyna sáıkes aı saıynǵy aqshalaı syıaqy alyp otyr.
Máslıhat otyrysynda Parıj Olımpıadasyna qatysatyn sportshylardyń daıyndyq jumystaryna qatysty máseleler de qozǵaldy. О́tken jylǵy Álem, Azııa chempıonattarynda oblys sportshylary Abdýlın Ilfat, Eremenko Aleksandr, Jańbyrbaı Dáýletkeldi 2024 jylǵy Parıjde ótetin XXXIII jazǵy Olımpıada oıyndaryna qatysý úshin 4 lısenzııa jeńip alǵanyn sala basshysy alǵa tartty. Sonymen qatar sporttyń 6 túri boıynsha lısenzııa alýdy josparlap otyrǵanyn sóz etti. Qazirgi tańda oblys sportshylaryna jan-jaqty qoldaý kórsetilip jatqanynan aqpar berdi.
Jetisý oblysynda halyqtyń sportpen aınalysýyna barynsha jaǵdaı jasalyp keledi. Buqaralyq sportty damytý jáne ony jolǵa qoıý baǵdarlamasy da tııanaqty júzege asyp jatyr. Oblysymyzdaǵy ár eldi mekende sporttyq keshen boı kóterip, halyq ıgiligine berilip jatyr.
Jetisý oblysy
