Otyrysty ashqan Edil Jańbyrshın atalǵan zań jobasy 2023 jylǵy 19 sáýirde Memleket basshysy Qasym-Jomart Toqaevtyń elimizdiń áleýmettik-ekonomıkalyq damý máseleleri jónindegi keńeıtilgen keńesinde berilgen tapsyrmasyna sáıkes Májilis depýtattarynyń bastamasymen ázirlengenin eske saldy.
Jıynda zań jobasyna bastamashylyq jasaǵan depýtattardyń biri Samat Musabaev baıandama jasady. Depýtattyń pikirinshe, zań jobasyn ázirleýge buralqy ıtter men qaraýsyz qalǵan janýarlardy retteýde qoldanystaǵy zańnyń naqty nátıje bermeýi negiz bolǵan.
«Qoǵamda kóptegen qordalanǵan rezonansty jaǵdaı oryn alyp otyr. Atap aıtsam, buralqy ıtter jáne qaraýsyz qalǵan janýarlardyń adamdarǵa, onyń ishinde balalarǵa agressııa kórsetip, densaýlyqtaryna nuqsan keltirgen. Saılaýshylardyń depýtattarmen kezdesýlerinde qoldanystaǵy zańdy qaıta qaraý jónindegi talaptary da bar. Sonymen qatar BAQ ókilderiniń jáne áleýmettik jelilerde qoǵamnyń buralqy jáne qaraýsyz qalǵan ıtterdiń máselesin jıi kóterýi sebep bolyp otyr. Memleket basshysy atap ótkendeı, biz janýarlarǵa qamqorlyq jasaýymyz kerek, biraq olardyń adamdarǵa, ásirese, balalarǵa qatysty agressııasyna jol bermeý kerekpiz», dedi S.Musabaev.
Osyǵan baılanysty, depýtattar tarapynan zań jobasyna birshama usynys engizilgen.
«Birinshiden, janýarlardy esepke alýdyń biryńǵaı elektrondyq bazasyn ortalyqtandyrý. Ekinshiden, janýardy ýaqytsha ustaý ornyna ornalastyrǵanǵa deıin janýardyń ıesine odan bas tartýǵa tyıym salýdy belgileý, sondaı-aq janýardyń ıesine ony dalaǵa tastamaı, ýaqytsha ustaý ornyna ótkizýdi mindetteý. Úshinshiden, janýarlar agressııa tanytyp, shabýyldaǵan jaǵdaılarda jergilikti atqarýshy organdardyń osyndaı oqıǵalarǵa shuǵyl den qoıý sharalaryn uıymdastyrý mindetin belgileý. Tórtinshiden, aýrýǵa shaldyqqan, agressııa kórsetetin, zooqorǵaý uıymdary men ózge de tulǵalar tarapynan ornastyrylmaǵan jáne talap etilmegen janýarlardyń sanyn retteý úshin, eger olar buralqy ıtter bolsa 15 kún ishinde, al eger olar qaraýsyz qalǵan janýarlar bolsa 60 kún ishinde evtanazııa qoldaný sekildi normalar qarastyrylǵan», delingen Májilis baspasóz qyzmeti taratqan habarlamada.
Otyrys barysynda Májilis depýtattary men qoǵam ókilderi qyzý pikir almasyp, suraqtaryn qoıdy. Atap aıtqanda, Májilis depýtaty Marhabat Jaıymbetuly, «Animal Law PIýK «KazBar» komıtetiniń basshysy Olga Chensova, Ulytaý oblystyq máslıhatynyń turaqty komıssııasynyń tóraǵasy Bodyqov Erkebulan, Pavlodar oblystyq máslıhatynyń depýtaty Amangeldiuly Mahambet jáne taǵy basqalar buralqy ıtter máselesine qatysty oılaryn tarqatty.
