Ýkraına prezıdenti Qazaqstanǵa resmı saparmen keledi

ASTANA. 13 qańtar. Bıylǵy jyldyń birinshi toqsanynda Ýkraına prezıdenti Petr Poroshenkonyń Qazaqstanǵa resmı sapary josparlanǵan. Bul týraly nur.kz habarlady. «2015 jyldyń birinshi toqsanynda Ýkraına prezıdenti Petr Poroshenkonyń Qazaqstanǵa sapary josparlanyp otyr. Sapar aıasynda ekonomıkalyq áriptestik boıynsha memleketaralyq komıssııanyń 12-shi otyrysy ótkiziledi. Bolashaqta avıaqurylys jáne ǵaryshty zertteý salalarynda ekijaqty iri jobalardy iske asyrý daıyndalýda», – dep málimdedi Ýkraınanyń Qazaqstandaǵy ýaqytsha senimdi ókili Iýrıı Lazebnık. Onyń aıtýynsha, Ýkraınadaǵy jaǵdaıdy retteý aıasynda Astanada Ýkraına, Fransııa, Reseı jáne Germanııa basshylarynyń qatysýymen kezdesý ótkiziledi. «Qazaqstan tarapy mundaı kezdesýdi ýaqyty belgili bolysymen ótkizýge kelisimin berip otyr. Bul basqosýda, Ýkraına prezıdenti birneshe ret atap ótkendeı, ótken jyldyń qyrkúıeginde qol jetkizilgen Mınsk kelisimderiniń tolyq oryndalýyn qamtamasyz etý qaralady. Sol kelisim oryndalýy tıis», – dedi Iý.Lazebnık. Aıdar О́risbaev. Derek: nur.kz. Sýret: tass.com.