Foto: Aqorda
Agenttik tóraǵasynyń málimeti boıynsha jyl basynan beri elimizde 947 jemqorlyqqa qatysty qylmys tirkelip, 660 adam áshkerelendi. Onyń 104-i – ártúrli deńgeıdegi basshylar. Tergeý amaldary aıaqtalǵan qylmystyq ister aıasynda 193,5 mıllıard teńge óteldi. Jalpy, 2022 jyldan beri memleketke jáne kvazımemlekettik sektor sýbektilerine 1,03 trıllıon teńge kóleminde múliktik aktıvter men qarjy qaıtaryldy.
Bıyl bilim, ǵylym, sport, dári-dármek satyp alý, qurylys, jer telimderin bólý salalaryna júrgizilgen taldaý jáne monıtorıng jumystarynyń qorytyndysy boıynsha 113 esep ázirlendi. Memlekettik organdarǵa jemqorlyq táýekelderin joıýǵa baǵyttalǵan myńnan astam usynys berildi.
Aldyn alý sharalary aıasynda, sonyń ishinde «Biryńǵaı satyp alý terezesi» portalyna monıtorıng júrgizý arqyly 31 mıllıard teńgeden astam bıýdjet qarajatynyń tıimsiz jumsalýyna jol berilmedi. «Bızneske jol» jobasyn júzege asyrý kezinde 7,5 myńǵa jýyq kásipkerdiń quqyǵy qorǵalyp, 67 túıtkildi keıs sheshimin tapty.
Sonymen qatar Qasym-Jomart Toqaevqa jol salasyndaǵy jemqorlyq áreketterdi joıýǵa qatysty tapsyrmasynyń oryndalý barysy jóninde baıandaldy. Agenttik tóraǵasy «aqshany boıaý» pılottyq jobasyn áleýmettik mańyzy bar salalarda, sonyń ishinde jol qurylysynda iske asyrý josparlanyp otyrǵanyn aıtty.
Budan bólek, Memleket basshysyna jyl basynan beri Qatar, Gonkong, Ázerbaıjan jáne Reseı Federasııasynyń sybaılas jemqorlyqqa qarsy vedomstvolarymen yntymaqtastyq týraly 4 memorandýmǵa qol qoıylǵany jaıynda málimet berildi. Atalǵan qujattar quqyqtyq kómek kórsetý, aktıvterdi qaıtarý, adamdardy izdestirý, bıýdjet qarajatynyń maqsatty jumsalýyna jáne satyp alý úderisine monıtorıng júrgizý máseleleri boıynsha seriktestikti nyǵaıtýǵa baǵyttalǵan.
Kezdesý sońynda Qasym-Jomart Toqaev birqatar naqty tapsyrma berdi.
