Úsh kúnge sozylǵan álem chempıonatynda saıysqa túsken balýandarymyz aıanyp qalǵan joq. Ulttyq quramanyń bas bapkeri Birjan Imahanov doda qarsańynda keminde eki altyn alý mindeti júktelgenin aıtqan edi. Shákirtteri senim údesinen shyǵyp, úsh márte ánuranymyzdy shyrqatty.
Tórtkúl dúnıe kóz tikken dúbirli dodanyń túńligi túrilgen birinshi saıys kúni sporttyq sambodan Temirlan Kólbaı (+98 kg) jeńiske jetti. Irikteý kezeńinde ol aldymen japon Kenıchı Nakaıamany jyqty, ekinshi aınalymda Gondýras eliniń ókili Bred Floresten basym tústi. Shırek fınaldyq beldesýde ózbekstandyq Nurbek Týraevty súrindirdi. Jartylaı fınalda Stepan Soldatenkony (FIAS) jyqty. Fınaldyq tartysta mońǵolııalyq Pýrevdorj Damdınchýrendi utty.
Birinshi saıys kúninde sporttyq sambodan Armat Qabdolov (58 kg), Araılym Ábenova (+80 kg), jaýyngerlik sambodan Quralaı Qabraıqyzy (54 kg), Maratbek Rahmetollın (64 kg) álem chempıonatynyń qola medalin ıelendi.
Álem chempıonatynyń ekinshi saıys kúninde de balýandarymyz senimdi aqtaı bildi. 64 kg salmaq dárejesinde beldesýge túsken Esentaı Imahanov fınaldyq beldesýde Sardor Olımjanovty súrindirdi. Tájirıbeli ózbek balýany upaı basymdyǵymen alda turǵan, sońǵy mınýttyń barysynda Esentaı qarsylasynan aılasyn asyryp ketti. Eki balýan buǵan deıin Azııa chempıonatynda da beldesip, Sardor basym túsken bolatyn. Esesin qaıtarǵan Esentaı qalyń jankúıerdiń erekshe qoldaǵanyna alǵysyn aıtty.
88 kg salmaqta kúresken Elaman Qoıshybaevtan da bapkerler altyn júlde kútti. Fınaldyq tartysqa deıingi qarsylastarynyń bárin aıqyn utqan balýan reseılik Sergeı Rıabovqa ese jiberdi. Álem chempıonatynyń fınalyna buǵan deıin 7 márte shyǵyp, jahan dodasynyń tórt dúrkin úzdigi atanǵan Rıabov aldymen ádis jasap, upaı enshilep aldy da, sodan soń Elamannyń adymyn ashtyrmaı qoıdy. Byltyr da álem chempıonatynyń fınaldyq básekesinde súrinip, kúmispen kúptelgen jerlesimiz bıyl babynda boldy. Makaoda ótken Azııa chempıonatynda úzdik shyqty, álem kýboginiń júldegeri atandy.
Qyzdar arasynda sporttyq sambodan Gúldana Álmuhanbe-tova 54 kg salmaqta synǵa túsip, fınalǵa deıin jetken edi. Biraq álem chempıony ataǵy jolyndaǵy beldesýde Anastasııa Lýkanınamen (FIAS) kúresip, jeńilis tapty. Eýropa chempıony ataǵyna ıe Anastasııa Astanada endi álemniń úzdigi atandy.
Dúbirli dodanyń qola medalin jaýyngerlik sambodan Arnur Qýataı (71 kg), Ulbosyn Ádilova (80 kg), sporttyq sambo kúresinen Shynar Abatova (72 kg) enshiledi.
Úshinshi saıys kúninde ánuranymyzdy balýan qyzymyz shyrqatyp, mereıimizdi tasytty. Áıelder Astana tórinde jaýyngerlik sambodan tuńǵysh ret álem chempıonatyna qatysty. +80 kg salmaqta synǵa túsken Nurıla Asanqyzy fınaldyq tartysta Sabına Agajanovany 7:4 esebimen utyp, mártebemizdi ósirdi. Álemniń úzdigi atanǵan sportshy tókken terdiń óteýine buıyrǵan orasan jeńisin bir jyl buryn ómirden ozǵan ata-anasynyń rýhyna arnaıtynyn aıtty.
«Jetkinshek shaǵymnan kúrespen shuǵyldanýyma septigin tıgizgen ákem: «Jasóspirimder arasynda jarqyrap kóriný jeńil bolǵanymen, eresekter dodasyna qosylǵanda myqty ekenińdi dáleldeý ońaı soqpaıdy», dep únemi aıtyp otyratyn edi. Rasynda da, eresekter qatarynda ózińniń myqtylyǵyńdy moıyndatý jeńil emes. Birneshe jyl tókken terdiń óteýine buıyrdy bul altyn medal. Osy jeńisimdi baqılyq bolǵan ata-anama arnaımyn», dedi chempıon qyz.
Jaýyngerlik sambodan 79 kg salmaq dárejesinde fınalǵa shyqqan Baqytjan Dúısembekov ýkraınalyq Vladıslav Rýdnıevke ese jiberdi. Ýkraına balýany – buǵan deıin 4 dúrkin álem chempıony atanǵan sańlaq. Eýropa birinshiliginde úsh márte olja salǵan óte tegeýrindi sportshy. Jerlesimizdiń kúmis medalin qomsynýǵa bolmas. Sebebi Baqytjan byltyrǵy álem chempıonatynda 5-oryndy mise tutqan bolatyn.
Álem chempıonatynyń fınalyna shyqqan Serikbaı Nyǵmet (71 kg) grýzııalyq Elızbar Týrkııaǵa ese jiberdi. Buǵan deıin jasóspirimder arasynda álemniń úzdigi atanǵan grýzın sportshysy eresekter sapynda da teńdessiz ekenin dáleldedi. Serikbaıdyń kúmis medali – álem chempıonatynda oljalaǵan alǵashqy júldesi.
Jaýyngerlik sambodan synǵa túsken Talǵat Jırentaev (+98 kg) fınalda Mıhaıl Kashýrnıkovke (FIAS) ese jiberdi. Talǵat byltyr Armenııada ótken álem birinshiliginde qola medal enshilegen edi. Jaýyngerlik sambodan Qymbat Ahmet (50 kg), zaǵıptar sanatynda Asqar Qaıyrov (98 kg) qola medal ıelendi.
Úsh kúnge ulasqan dúbirli dodaǵa 80 elden 470 balýan jınaldy. Elimizdiń úmitin arqalap shyqqan 28 sportshy baryn salyp beldesti. Dúnıejúzilik birinshiliktiń júlde qory da qomaqty. Chempıon atanǵan balýanǵa – 4 myń, kúmis júldegerge – 3 myń, qola medal ıelengen balýandarǵa 2 myń AQSh dollary mólsherinde syıaqy berildi. Zaǵıptar arasynda chempıon atanǵan úzdikter 1 myń dollar kóleminde syıaqymen marapattaldy.
2005 jyldyń qarasha aıynda Astana qalasynda sporttyq sambodan álem chempıonaty ótken edi. Sol synda balýandarymyz 1 altyn, 3 kúmis, 6 qola medal oljalaǵan-dy. Sambo federasııasynyń vıse-prezıdenti Manarbek Bısekenov el sportynyń tarıhynda sambo kúresinen buryn mundaı jetistikke jetpegenimizdi aıtty.
«Segiz balýan fınalǵa shyǵyp, 3 altyn, 5 kúmis medal buıyrdy, 9 balýan qola júldeger atandy. Jalpykomandalyq esepte Reseı komandasynan keıin ekinshi satyǵa ornyqtyq. Sportshylarymyz senimdi aqtaı bildi. Bul kúres túri álemde qarqyndy damyp keledi, básekelestik óte joǵary. Osyndaı sańlaqtardy yǵystyryp medal enshileý ońaı emes», degen vıse-prezıdent qoldaý kórsetken jankúıerlerge, álem chempıonatynyń joǵary deńgeıde ótýine uıytqy bolǵan Týrızm jáne sport mınıstrligine, Astana qalasynyń ákimdigine, demeýshilik tanytqan ózge de ujymdarǵa alǵysyn bildirdi.
