Sáben bapker Gennadıı Golovkın, Serik Eleýov syndy el baıraǵyn bıikten jelbiretken sportshylardy baptady. Týrnırdiń saltanatty ashylý rásiminde qurmetti meımandar S.Álkeevtiń sportqa sińirgen eńbegi jóninde estelik aıtyp, jarysqa qatysýshylarǵa sáttilik, jeńis tiledi.
S.Álkeev Qaraǵandy oblysynda dúnıege keldi. Sporttyq mekemelerdegi eńbek ótili jarty ǵasyrdan erkin asady. Instıtýt bitirgennen soń, eńbek jolyn aýyldaǵy deneshynyqtyrý pániniń muǵalimi retinde bastaıdy. Odan soń Selınograd qalasynda kooperatıvtik tehnıkýmda, pedagogıkalyq ýchılıshede jumys istedi. Aýdandyq sporttyq mekemelerde de birtalaı eńbek etti. 1980–1987 jyldary «Eńbek» keshendi balalar men jasóspirimder sport mektebinde basshynyń orynbasary qyzmetin atqardy. 1987–1994 jyldary sport mektebinde dırektor, 1994–2008 jyldary Qaraǵandy oblysynyń Dene shynyqtyrý jáne sport basqarmasynyń Mamandandyrylǵan balalar men jasóspirimder sport mektebiniń dırektory boldy.
Ol basqarǵan jyldary óńirde kıkboksıng, taekvondo WTF, qoıan-qoltyq urys, taekvondo ITF (I.T.F), karate WKF bólimderi ashyldy. Mektepke ataqty jattyqtyrýshylar men tárbıelenýshiler keldi. 1994–2001 jyldary oqytý-jattyqtyrý sabaqtary jalǵa alǵan bazalarda ótkiziletin. S.Álkeevtiń iskerligi arqasynda 2001 jyldyń aqpan aıynda mektepke jedel basqarý quqyǵynda «Orbıta-1» shaǵyn aýdanyndaǵy, aýmaǵy 1400 sharshy metr bos turǵan balabaqsha ǵımaraty berildi. Ǵımarat qaıta qalpyna keltirilip, munda taekvondo, kıkboksıng, qoıan-qoltyq urys, karate bólimderiniń balalary jattyǵatyn boldy. Sol jyly onyń basshylyǵymen mektep qyzmetkerleriniń kúshimen qujattary joq, buzylǵan kúıde alǵan «Brıgantına» lagerinde jóndeý jumysyn júrgizip, qalpyna keltirdi. 2004 jyly ataýy «Jalyn» mektebi bolyp ózgertildi. Lagerde 2001 jyldan beri az qamtylǵan otbasylardyń balalary demalady, sporttyq-saýyqtyrý jıyndary ótkiziledi.
Bilikti bapker ulttyq, halyqaralyq sporttyń damýyna zor úlesin qosty. Shákirtteri álem, Azııa chempıonattary, halyqaralyq jarystarda jaqsy nátıjelerge qol jetkizgeni úshin oǵan «Eńbek sińirgen jattyqtyrýshy» ataǵy berildi. «Dene shynyqtyrý jáne sporttyń damýyna úlken úles qosqany úshin» qurmet belgisimen marapattaldy. Mine, osyndaı bilikti bapker, sporttyń shyn janashyrynyń esimi ardaqtaldy. Týrnırde top jarǵan jeńimpazdar arnaıy júldelerge ıe boldy.
Qaraǵandy oblysy
