Bıylǵy kesh ózgeshe sıpat aldy. Keshtiń qurylymyn belgili teatr akteri ári rejısseri Dýnaı Espaev jasap, qoıylymdyq turǵyda jańa serpin ákeldi.
– Arqada talantty jastar kóp. Biri – óleń jazsa, biri – ándi júrekpen oryndaıdy. «Qarashada ómir tur…» keshi sol daryn ıelerin tabystyryp, jańa izdenisterge jol ashady. Sahnada býyn sabaqtastyǵy kórinis tabady. Erteńgi mádenıettiń júgin arqalaıtyn jańa tolqyn osy ortada ósip keledi, – deıdi Dýnaı Espaev.
Keshti «Tattimbend» ansambli jandy mýzykamen súıemeldep otyrdy. Áýenmen órilgen óleń – kórermenin óziniń ádemi álemine baýrap aldy.
Poezııa keshi Abaı atyndaǵy Memlekettik syılyqtyń laýreaty, aqyn Serik Aqsuńqarulynyń «О́mir degen – kúndi aınalý» atty óleńimen bastaldy. Jas aqyn Erik Naryn erekshe sezimmen oqyǵan bul óleń keshtiń rýhanı baǵytyn aıqyndap, oıdyń bıigine jetelegendeı edi.
Odan ári Baǵdat Múbárak, Rýslan Nurbaı, Serik Saǵyntaı syndy aqyndardyń jyrlaryn «Dat» teatrynyń akterleri oqydy. Al Erǵanat Keńesbekuly, Saltanat Smaǵultegi, Sultan Dáýlethan óleńderimen keshtiń taqyrybyn asha túskendeı.
Keshte sondaı-aq, Qýanysh Medeýbaev, Aıbek Baıtóre, Jálel Shalqar, Erbolat Qýatbek syndy jas shaıyrlardyń jyrlary da oqyldy. Ár jol, ár yrǵaq – bir taǵdyr, bir tynys, bir muń men bir úmittiń kórinisindeı. Kúzdiń sary boıaýyndaı názik te syrly óleńder men klassıkalyq ánder kórermen júregin terbedi.
Aıtpaqshy, «Dat» teatrynyń quramyndaǵy eń jas akter Toqtar Káribaı ádebı sazdy keshtegi kórermen kózaıymy boldy. О́nerge degen qushtarlyǵy erte oıanǵan mektep oqýshysy Erbolat Qýatbektiń óleńin oqydy.
Kesh sońyn Qazaqstannyń eńbek sińirgen ártisi, belgili ánshi-kompozıtor Gúlnár Dáýkenova Muqaǵalı Maqataevtyń sózine jazylǵan «Kúreń kúz» ánimen túıindedi.
Qaraǵandy oblysy
