Foto: gov.kz
Buǵan deıin áleýmettik jelide marqum Nuraı Serikbaıdyń týystary istiń ádil tergelýine qatysty ótinish-tilegin jarııalaǵan edi.
Búgin Ishki ister mınıstrligi atalǵan kisi ólimi faktisi boıynsha tergeý barysyn baqylaýǵa alǵanyn málimdedi.
«Shymkent qalasy polısııa qyzmetkerleri tarapynan ýaqtyly sharalar qabyldanbaýy múmkin degen pikirler men ýájder boıynsha qyzmettik tekserý taǵaıyndaldy. Qazir kúdikti sot sanksııasymen qamaýǵa alyndy. Eń tájirıbeli qyzmetkerler qatarynan arnaıy tergeý-jedel toby quryldy. Qylmystyq is aıasynda júrgizilip jatqan tergeý áreketteriniń nátıjeleri boıynsha kúdiktiniń barlyq áreketine quqyqtyq baǵa beriledi», delingen mınıstrlik málimetinde.
Qazir tergeý-jedel is-sharalar kesheni jalǵasyp jatyr. IIM tergeý barysynda túsken málimetter, sonyń ishinde beınebaqylaý kameralarynan alynǵan jazbalar muqııat tekserilip, taldanatynyn habarlady.
Sondaı-aq vedomstvo kináli adam tıisti jazasyn alýy úshin zańda kózdelgen barlyq sharalardy qabyldaıtynyn eskertip otyr.
Eske salaıyq, Nuraıdyń ólimi boıynsha kúdikti Sherhan Aımahan dep tanyldy.
Marqumnyń týystary kúdikti Nuraıdyń ár qadamyn ańdyǵanyn jetkizdi.
Al qurbylary qaıǵyly oqıǵaǵa deıin Sherhan Aımahan Nuraıdy erkinen tys alyp qashqanyn aıtty.
